今日推介兩隻藍籌嘅Call輪，相關藍籌係電盈（008）同恒生（011）。中移動（941）昨日升80仙，聯通（762）漲30仙。電盈收5.55元，冇份升。下一回合，估計係兩隻國內電訊股帶動電盈。
恒指破上次高位，電盈則距當時6.05元有唔小水位。揀Call輪買，9791係正路對象，明年3月到期，輪價1.28元，溢價4.1%，槓桿率4.4倍。想博大堆，揀9766，但要留意呢件係末日輪，撞啱睇錯正股，揸9766冇得守。9791雖然槓桿率唔多夠大，但勝在壽命長，買賣易，及正股有波幅。正股隨時郁三幾毫子，揸隻輪唔難執15-20%利錢，短炒易贏。
滙豐（005）愈升愈有，收119元，再進帳兩蚊。揸咗近期不斷推介嘅滙豐Call輪如9845、9908、9923，肥過肥仔水。
滙豐見新高，將來更高在後頭，但9RSI去到79.22，短期可能跑輸畀個仔恒生（011）。恒生上月21日最高100.50元，當時滙豐114元，恒生滙豐「差價」13.50元，恒生昨收97.50元，升得半元，恒生滙豐「差價」21.50元，拉闊咗8元。炒恒生Call輪係時候，搏殺買9162，恒生跟滙豐跑，揸9162三朝兩日執三兩成唔出奇。正股97.50元，隻輪行使價100元，輕微價外，好好炒。
章盛