住家菜：
鍵鋒煎牛柳心得先猛火後文火

做完律政新人王，這陣子又在螢幕上看到陳鍵鋒當飛機師。除了揸飛機外，原來陳鍵鋒揸鑊鏟都有兩下手勢，經理人重話鍵鋒啱啱教完佢煮意粉。講開食，斯文靚仔的陳鍵鋒當堂眉飛色舞：「除咗南乳、笋同豬紅，我乜都鍾意食。」其中又對西餐略有偏好，今日重話要扮演廚神教煮牛柳和沙律。
記者：吳佩璇
攝影：陳盛臣
場地提供：帝都酒店百勝閣
電話：26943886

加入娛樂圈，是18歲的事，由DJ到螢光幕。說到煮食，卻自小已學會。「媽咪煮嘢都OK㗎，細個咪跟佢學吓學吓囉。我哋係潮州人，所以我整蠔餅都掂㗎！又試過親自下廚招呼朋友。不過整甜品我就麻麻，有次整到啲燉蛋硬晒！」

保健心得日飲10杯水
說到近期的拿手好菜，鍵鋒笑說：「公仔麵同叮叮點心。」入廚次數跟人氣指數成反比！但正是因為忙，即使不能親自下廚，對飲食還是很有要求。鍵鋒自謔為水怪，一日飲足10杯水，且水不離身。從小對薯片、汽水等零食都不感興趣，就連菊花精之類也不喝，總之就是飲水飽！怪不得他一臉青靚白淨。今日在讀者面前獻藝，也以健康清新為前提。

小檔案：
原名：陳恩耀（名字何來？生於基督教家庭。）
年齡：25歲
入行：18歲參加新城電台「全能DJ大賽」奪冠。
動向：繼《律政新人王》、《執法群英II》及現正播緊的《衝上雲霄》後，現正忙於拍攝清裝劇，最突破係飾演梁寬，繼續抱打不平。

美國牛柳配香草蘑菇汁
自煮價：$70
扒，是鍵鋒的至愛，尤其是牛扒，食得最嘴刁。「食牛好似好肥，但我覺得點都要食啲肉先夠全面。」於是他會揀牛之中最瘦的部份──牛柳，事關肉眼扒及西冷扒，都必然有肥膏，但牛柳只需將有筋的部份除去，便全是很瘦的部份，煎至五成熟就啱啱好，火力亦好重要，要先猛火後文火。加上甜椒及蘑菇汁等，都是健康食物。講到煮汁，原來鍵鋒屋企有一樽秘製醬汁，是以蠔油、豆粉、黑椒、牛油、糖、葱粒、生抽、老抽、蒜……等煮成，無論煮牛扒抑或雞翼，都會用到呢個汁。

用咩料：
美國牛柳150克、甜椒6片、薯仔（去皮）50克、意粉數條、露絲瑪利香草1棵、白蘭地紅酒30克、燒汁（GravyPowder）50克、鮮忌廉少許、蘑菇適量

蘇格蘭煙三文魚沙律自煮價：$50
沙律是鍵鋒另一至愛，今日示範的是健康的煙三文魚沙律。此沙律的最大特色是用了菠蘿、菜油及白洋醋等，自調秘製菠蘿油醋汁，不但天然健康，而且很少人做沙律會用菠蘿做Dressing，夠特別之餘，酸甜味道又有幫助消化的作用。

用咩料：
煙三文魚數片、羅馬生菜1/2棵、紅葉菜數片、九芽菜數片、蘆笋4條

菠蘿油醋汁：
菠蘿20克、甘笋30克、西芹10克、白洋醋25克、菜油50克、胡椒粉少許、鹽及糖適量