唔少過氣球星都已經去到卡塔爾業餘聯賽落班，到中東掘金，其中最出名當然係巴迪斯圖達，重有艾芬保亦係佢隊友。不過，我求大俠得知兩名世界猛將場上表現竟然受到當地報章批評。
事緣兩人效力的阿拉比，最近一場聯賽，面對有拿保夫壓陣的阿薩德，被對手狂轟七球慘敗。「巴迪高」同「壞孩子」賽後就畀當地報章批評，表現差劣，喺二十二名正選球員之中，得分最低；重已經係第二次狠狠地畀最低分，認真無面畀。當然，要降格到業餘聯賽，唔易適應，但兩人月薪成二百幾萬港紙，而且卡塔爾足總特登重金禮聘過氣球星，目的都係想推高當地本土球員水平。球星們，咪淨係識歎世界好喎！
日前我求大俠咪話列斯前鋒維杜卡紀律唔好，所以俾領隊列特雪藏，列斯噚日重打算罰佢十三萬鎊（約一百六十九萬港元）。有口痕友就話可能列斯見自己財政唔好，順便罰維杜卡幫補吓。另外，曼城前鋒安歷卡喺上場被棄用，原來因唔肯出席球隊團體活動，唔合群抵罰！
前晚德甲聯多蒙特主場對漢堡，睇住漢堡喺六十分鐘領先到二比○，我求大俠心諗呢勻多蒙特真係要喺主場斷纜！點知唔使十分鐘，又俾佢哋反勝三比二至完場，認真戲劇性！呢場已經係漢堡連續第四場輸盤，亦造就多蒙特保住今季主場八戰全勝紀錄，漢堡究竟幾時至「反底」呢？
古柏自從俾國米「魔人」莫拉堤炒魷後，就一直都無影，但佢經理人話，古柏成自由身後，好多球會都想搵佢做教練。不過，古柏就決定豹隱，重話○五至○六年球季前都唔會出山。其實，我求大俠幾欣賞古柏，以佢料子唔憂無班落，但奉勸唔好教踢進攻球隊，否則無好結果！