金城武早前在烏克蘭拍攝張藝謀執導的《十面埋伏》時，曾不慎用劍刺傷武術指導，令對方臉部需縫針，而日前身處台灣的劉德華亦透露，他拍攝該片時亦曾被金城武以刀劈傷臉，使他眉頭及鼻樑受創。
記者蔡如育台北直擊
劉德華（華仔）大前日與一百名歌迷到台灣自由行，當晚他與工作人員到台北太和殿吃麻辣火鍋，提到早前到烏克蘭拍攝張藝謀執導的新片《十面埋伏》時，華仔透露曾被金城武意外劈傷面部，只見他眉頭上方有傷痕，鼻樑上有一小點瘀傷，雙手亦滿布赤紅傷口。
金城武早前拍攝《十面埋伏》時曾不小心以劍刺傷武指，想不到今次又弄傷華仔，對此華仔說：「嗰場戲打得好激烈，決戰前夕嘛，不過係我自己擋唔到佢把刀，我擋遲咗，佢好驚呀，猛問我有冇事，你整親人你都驚啦！」但華仔表示不會因此而索取工傷賠償。
那麼金城武又有否受傷？華仔笑說：「佢梗係有，大家咁高咁大啦，我打佢先嘅，不過我同佢之後冇打戲喇。」難道金城武怕了華仔所以不再與他對打？華仔笑說：「係呀，怕咗我慢呀，我打快啲咪得囉。」
華仔透露再拍多一場與章子怡的打戲，其武打戲份便完成，他下月會與梅艷芳到北京及四川拍文戲。阿梅在片中飾演飛刀門門主，但有報道指阿梅因病情欠佳，張藝謀已將其打戲刪掉，對此華仔說：「據我所知佢十二月係會去拍嘅，佢喺戲入面所有部份都同我一齊，我知佢呢個角色係用計同用飛刀，所以全部係文戲。」
阿梅日前因接受完化療而口齒不清，華仔說：「我同佢講電話又冇呢個情況喎，係咪剛瞓醒啲安眠藥未散呀？有時食藥係會有副作用，唔係因為身體變差令佢咁，每次做療程後久唔久就會咁，佢已經好堅強。」
有報道指華仔會安排醫護人員陪阿梅拍戲，他說：「我初初以為佢去烏克蘭，先諗住話搵個私家看護陪佢去，嗰度唔係中國人地方，唔想言語不通，點知佢唔使去，去四川就唔使啦。」
