唔通阿董真係咁黑，九七之後，唔只妖魔鬼怪加沙士，連鱷魚都蒲埋頭？《蘋果》獨家報道南生圍出現食人大鱷，電子傳媒紛紛跟進，家家都影到條大鱷點樣爬行、食魚、曬太陽，獨係警方同漁護署人員一去到，條鱷魚就潛水隱形，冇晒影，連啲冇性嘅生靈，都好似同呢個政府作對，九七年九月有西方金融大鱷，今時今日就有南生圍大鱷，都咪話唔令人對呢個政府流番兩滴同情嘅鱷魚淚。
最慘嘅就係，漁護署同警方都承認，以往從無捉鱷魚嘅經驗，攞埋啲捉山狗、野貓嘅小兒科架生到場。對付沙士同大鱷，呢個政府都缺乏經驗，漁護署署長唔使怕：就算條鱷魚由今日起，一日生吞一個村民，𡁻夠二百九十九個，正如阿董話頭：經一事、長一智，都不必問責，毋須炒魷落台。咁條鱷魚，咪任得佢養肥啲囉，使乜咁緊張呢又？
英國都有個尼斯湖怪，聽講久唔久蒲吓頭，平時潛水，吸引全球無數遊客，帶挈搵唔少錢。南生圍大鱷，未必係負資產，用嚟做觀光景點，吸引啲「自由行」遊客，人人踎喺處等大鱷出現，然後在現場自費購買生雞，掟落去畀隻鱷魚食，當做係旅遊項目，都可以同庫房賺番少少。
有個不願透露姓名嘅「倒董力量」組織成員，打電話畀八方獻計，話想條鱷魚蒲頭好易，只要喺圍邊，戙一塊阿董嘅紙板公仔，掛一件特首着過嘅西裝，條鱷魚矇查查見到，聞到陣除，一定會即時撲上嚟狂噬塊紙板，漁護人員一擁而上，咁咪捉到隻嘢囉。
咁嘅建議，簡直全無理性，自然即時遭到八方喺電話中駁斥，因為喺邏輯上，效果可能係啱啱相反：條鱷魚會嚇到更加匿埋，咁咪重更難捉到囉。
沙士、怪鱷、秋官，今年「三大奇景」嚴格嚟講，冇一樣除得到。本來，抗擊大鱷，唯一有經驗嘅，梗係用千億元掟出嚟嘅煲呔曾，見大鱷而思良將。不過，阿董同啲土共咁忌佢，又點會畀佢再次領功吖，唔紮起佢餵鱷魚，就已經好文明囉睇怕。
傳真︰2623-9278
電郵︰