鄭秀文（Sammi）前日喺台北舉行新碟記者會後，就去咗遠東購物中心五樓shopping，重對一件價值港幣五千幾蚊嘅MartinMargiela長袖衫好有興趣，攞住件衫不停照鏡。而當售貨員發現記者，重即刻出嚟阻止記者影相。
過咗一陣，記者再上五樓，發現通去五樓嘅扶手電梯停咗，但其他電梯就運作正常，莫非商場為咗Sammi而封舖？商場經理解釋話Sammi雖然係熟客，但唔會因為佢而封舖，因為商場八點閂門，五樓嘅扶手電梯會先停，講到似層層咁！
另外，噚日鄭秀文重去咗台北HitFm聯播網做宣傳，大會本來安排佢同五個貌似Sammi緋聞男友許志安同古天樂嘅男仔見面，但因唱片公司反對，惟有改為同五個靚仔見面。
不過咁啱得咁蹺，現場有個記者個樣竟然有啲似許志安，重俾人臨時拉伕上台獻花，Sammi見到呢個翻版安仔，表現得有啲尷尬，笑得好牽強，事後重用普通話話：「他不像呀，你們覺得像嗎？」
噚日溫碧霞義助導演關錦鵬，露膊露腿出席亞視記招，原來亞視噚晚開始播劉松仁、趙雅芝同謝君豪主演嘅劇集《嫁錯媽》，都唔知有心定係特登，正正對撼無綫台慶劇《西關大少》，呢套劇劉松仁同趙雅芝係主角之外，又係做一對。但噚日所有主角都冇到，只有溫碧霞性感撐場，不過佢唔小心走光，認真失策。
李玟同尊龍合作拍攝電影《自娛自樂》，佢哋喺戲入面飾演情侶，前晚兩人喺上海東方濱江飯店見面。李玟話尊龍神秘又有風度，保養工夫一流，重即時請教對方保養之道。佢哋一見面就咁好傾，唔怕投入唔到角色喇！
宋承憲同元斌呢啲喺亞洲咁受歡迎嘅韓國男星，如果推出裸體寫真，都咪話唔轟動。有韓國報章透露，最近有間香港嘅娛樂公司就睇準呢點，開到三千幾萬港幣請宋承憲露屁股兼全裸，而宋承憲方面亦承認有呢件事，重話謹慎咁研究緊中間嘅利害，聽講元斌亦喺邀請之列。如果成事，真係開心死啲女fans！
陶喆噚日原本喺昆明舉行簽名會，七千個籌一早派晒，攞唔到籌嘅歌迷仍然喺現場唔肯走，有歌迷喺酒店附近嘅天橋等，有啲重爬上大樹㖭。後嚟有fans俾人迫落橋，有啲就喺樹上面跌落地，內地公安為咗安全終止活動。陶喆之後開記者會，話好遺憾見唔到歌迷，重同歌迷道歉。其實fans想見偶像係人之常情，但搞到咁嘅環境，咪盞大家冇癮！
