今屆東京車展，場內展出有多款新車之餘，同時亦有多款全新概念車展出，當中除有早前介紹過嘅日產Fuga及鈴木Landbreeze外，原來韓國嘅起亞車廠（Kia），亦於場內展出最新嘅KCV-3開篷概念跑車，並備受在場車迷注視㖭！
呢款極具跑車氣息嘅起亞KCV-3，車身線條屬流線形設計之餘，開篷設計加上巨型跑車合金胎軨，匹配火紅色嘅車身顏色配搭，份外惹人注目；車廂布局亦有一定吸引力，空間闊落唔在講，一雙跑車座椅亦見有十足承托力，而且車內布局重好有CyberFeel㖭！另外，廠方就為其安排有一台2.0公升直4DOHC偈作核心，雖然廠方未有公布有關輸出數據，但一般相信匹配一套4前速自動波箱後，表現定必出色呢！