一聲CEPA開放香港電影進入內地，影藝界人士大為興奮，群起上京面聖，好不熱鬧。你知啦，內地有十三億人，香港電影不受外國電影配額限制，能夠搞到自由發行嘅話，諗吓市場之大，人都癲，以後投資者勇於下海，電影界搞手以至演員、茄喱啡，無不做到手軟，收錢亦收到手軟。
不過唔使咁歡喜住。《蘋果日報》娛樂版報道蕭若元監製、吳君如主演嘅《功夫足球》嘅三十集電視劇，遭內地封殺，內地電視台唔准買入，會令投資者「寰宇」及「M8」娛樂公司損失二千萬元版權收益。
點解封殺呢，咪就係蕭若元係倒董急先鋒，吳君如亦有反董囉。呢個故事話畀你哋聽，想賺錢呀，乖乖哋跟隨黨的路線啦。
此乃舊橋，十年河東、十年河西而已。紅透一時嘅阿姐汪明荃絕少拍電影，冇搵過真銀，係乜原因呢？就係三十年前佢喺邵氏拍過電影，但因為阿姐來自上海，做過少先隊紅領巾，唔肯為此而寫悔過書，所以「電影自由工會」唔畀佢做會員，即係話，佢嘅電影唔可以到台灣上映，於是就冇人再搵阿姐拍戲。
現在局勢完全調轉，冇人得閒理台灣市場，個個要搶內地，於是輪到蕭若元、吳君如遭殃咯，國民黨、共產黨想法相同，都係勇於排擠異見分子嘅。阿姐當年企硬，你估蕭若元、吳君如會唔會寫悔過書呢？叫澳門娛樂公司開個盤，相信有人落注。