港股連續第6日上升，恒指創出27個月新高，日中新高12412，收市12386，大升196點，11月期指更大升280點，收報12375，低水收窄到只有11點。
上月23日，港股大跌逾500點，已證明唔係中期調整，而只係小調整，恒指由高位12297落到11558，共回落739點，前後4個交易日，以「小調」而言，幅度和時間都可說足夠。今個升浪，以突破上升旗形來衡量，目標可指向12850。
藍籌股以滙豐（005）同中移動（941）最出色，特別係後者，大行買到開巷，早段有鬥搶的場面，呢兩隻大藍籌乃係今個升浪嘅火車頭，家吓大行紛紛睇好滙豐，個市真係重有排升。
國企調整，自由行概念股接力而上，最突出係富豪酒店（078），大升17%，卓悅（653）同恒豐金業（870）就有近14%進帳。遠東發展（035）收1.06元，升7%，20日線及50日線同在1.08元水平，呢個位一衝破，最少可見上月初的高位1.24元。
遠展擁有5家三四星級酒店，廣東省放寬自由行，遠展係最大受惠者，而佢嘅上海發展項目，提供豐厚收益，業績有力將股價推向更高水平。現年度（3月年結），大行已估計遠展盈利可達1.68億元，每股盈利15.6仙（已根據近期配股加權調整），05年度盈利更大增1.7倍，每股盈利40仙，即使以5倍PE計，股價亦可見2字頭。
基金股一收集完成，升勢一發動，通常都會有20%至30%進帳，國企嘅例子多的是，而近期則有中國外運（598），短短7日之內，由3.0元升到上4.0元，升幅逾30%。不過，買基金股要有耐性，甚至會有震倉嘅風險，但只要守得住，中線回報肯定好可觀。
基金同大行呢一輪又密密加碼收集隻海油服務（2883），噚日收2.3元，升5仙。睇走勢，由8月中開始形成大型複式頭肩底，阻力在2.325元，基金一買夠，就係破位之時，照度上去，最少可見2.8元。呢兩個交易日，海油服務成交已增加，破位而上，已有徵兆，好大機會成為中外運第二。
郭兆誠