荷李活女星安琪蓮娜祖莉（AngelinaJolie），早排同人講過自從同前夫比利卜科頓（BillyBobThornton）離婚後，已經成年冇同男人行房，搞到佢有啲寂寞難耐。呢位以前出晒名性開放嘅靚女，最近又同人講終於再同男人有肌膚之親。不過，安琪蓮娜懶神秘咁唔肯講同邊個搞過，而我呢個冒牌羅拉就發現頭號嫌疑犯，就係韋基馬（ValKilmer）！
呢排安琪蓮娜同韋基馬一齊拍攝新片《Alexander》，帶住養子麥度斯（Maddox）拍戲嘅安琪蓮娜，原來同韋基馬一齊入住位於比華利山嘅RafflesL'Ermitage酒店。狗仔隊偷拍到韋基馬不時陪安琪蓮娜喺酒店出出入入嘅相不特止，佢哋重俾人見到唔使埋位時，就喺酒店入面歎燭光晚餐，好似情侶咁煙韌。
韋基馬講起同安琪蓮娜𠵱家嘅關係嗰陣，重好耐人尋味，佢話：「安琪蓮娜同我好似喺架好high嘅飛機入面，感覺就係比愛更有力量！」而安琪蓮娜亦對韋基馬讚不絕口：「阿韋係一個好有深度嘅男人，我真係好like佢！」佢哋講到咁曖昧，我羅拉都覺得佢哋一定有啲嘢呀！