成班大導演、設計師、音樂人、傳媒人以至商人走埋一齊搞乜嘢呢？原來一班自命搞創意產業嘅人士，一心想為香港做啲好事，包括搞番好香港個品牌同埋為西九龍文化計劃出謀獻計。
大導演徐克同一班「香港工程」（ProjectHongKong）發起人，噚日喺田少有份嘅麗嘉酒店同班行家茶敍，唔知係咪7.1遊行之後，香港影藝人因為邊個有份上京照肺而引起咗恐慌，徐克主席就千萬強調，講明呢個新組織唔係政治組織，只係想滙集各路英雄意見，聲稱推動香港成為一個先進同有文化嘅國際都會，為子子孫孫做件好事。
而副主席黃英琦就話唔想乜都事後孔明，放馬後炮，所以煲呔哋唔做諮詢，佢哋聽日先搞個西九龍文化研討會，等大家發表吓高見。
呢班朋友咁有心為香港做事，重講到好心痛，老董如果在場，唔知會唔會好感動，因為呢班精英已經俾特區玩殘，買少見少。
（圖）由大導演徐克（右二）出任主席、黃英琦（右）任副主席嘅「香港工程」，發起人包括（左起）時裝設計師鄭兆良、GOD創辦人楊志超、廣告人陶威廉、商人余志明同商台嘅梁文道等。
傳真︰2623-9278
電郵︰