做生意至緊要多動腦筋，作為大業主嘅希慎興業，聽董事總經理利子厚講，旗下商場經營方式都有好明顯嘅轉變，唔再係以前嘅純業主（即收租佬）方式，而係同租客變成合作夥伴關係。因為咁，佢哋要深入了解每個租客嘅生意模式，即係話對每一個行業都要好認識，先可以知道同埋能夠滿足租客嘅需要。
以往，商場大業主只會同啲大租客，至採用定額加分成兩部份定租金。據了解，希慎就嚟翻新完成嘅銅鑼灣嘉蘭中心商場，會改名為利園二期，就全部租戶都會採用呢個計租方法，變相等於各租戶嘅行業，希慎都有份投資，同租客變成合作夥伴關係。唔知呢個係咪大趨勢呢？
對租戶嚟講，可能有啲商業秘密會俾大業主知道，但若租客有困難，大業主就可以好快出手幫助，容易度過難關。
發展商無論賣大型新盤，定係單幢樓，都落足心機粉飾示範單位，務求將樓盤最好嘅賣點展示畀公眾睇。九建喺西環嘅采逸軒，全幢單位得75個，但發展商就用咗成60萬整咗3個示範單位，重個個有主題兼唔同風格。
其中1個546方呎嘅C單位，全屋用晒海水藍做主色，包括窗簾、梳化同家具，好有海洋Feel，主題明顯不過，就係海洋世界，等參觀者有置身地中海嘅感覺。
賣樓話事人羅汝榮透露，原本個設計師選用其他顏色，佢就比較鍾情藍色，所以改咗，估唔到效果都幾好。
另外，大廈嘅電梯裡面，重罕有地裝咗部電視，等住戶搭𨋢時都有得睇。
上海舊年賣出嘅物業，樓面超過2.79億方呎，總值810億人民幣，可見發展潛力非常龐大，香港貿易發展局決定明年1月13至15號，喺上海世貿商城，舉辦第五屆香港基建及房地產服務博覽，幫港商開拓內地商機。
事關緊貿安排（CEPA）實施，由明年1月1日起，香港公司就可以獨資形式，喺內地投資豪宅發展、開設顧問工程公司、提供建築設計、城市規劃同風景園林設計等服務。貿發局服務業拓展總監陳嘉怡話，展覽會可以協助香港基建同房地產業嘅專業人士，把握商機，喺內地拓展業務。
今次係貿發局第3次喺上海舉辦呢類博覽會，佢哋估計會有約40家公司參展。上屆展覽地點係廣州。
世邦魏理仕一份報告指出，高檔次嘅服務式住宅，原來租務表現比豪宅優勝，即使喺沙士期間，租金仍然有得升。
報告話出現呢個現象，原來同全球經濟放緩有關，因為啲跨國企業只係派員工短期駐港做嘢，通常係3至4個月，咁簽兩年長約租樓畀員工住就唔係好化算，但租酒店又貴得滯，因此傾向畀筆錢員工，等佢自己搵地方住。
啲駐港嘅僱員，特別係後生嗰啲，梗係鍾意啲租期有彈性、單位有裝修，同有執房等服務嘅服務式住宅啦！所以高檔服務式住宅租金，淨係今年頭3季已經升咗7.5%。
今個月16號「健康快車」舉辦慈善步行籌款，美聯集團主席黃建業除咗呼籲員工參加外，當日重會親自帶隊。聽講有超過100名員工報咗名，包括董事級嘅陳坤興同林鳳芳。
舊年，「健康快車」都有搞步行籌款，美聯上下共有70人參加，今年就再進一步。至於「健康快車」籌到嘅善款，會用嚟協助內地白內障患者重見光明。
蘭西
電郵地址：
