鄭裕玲（嘟嘟）同呂方呢一對都拍咗好耐拖，佢兩個感情都相當穩定吓，前晚佢老友寇鴻萍同采蝶軒老闆梁廷鏘拉埋天窗，喺金鐘L16餐廳舉行結婚酒會，嘟嘟同呂方雙雙出席，點知咁啱喺門口撞到嘟嘟前男友甘國亮離開，佢哋就好大方咁打咗個招呼。之後新娘寇鴻萍掟花球嗰陣，個花球落咗喺嘟嘟面前，佢即時身手好敏捷咁接過花球，重笑到見牙唔見眼。司儀查小欣見到重唔玩吓佢兩個咩，稱呼呂方同嘟嘟做伉儷，點知嘟嘟又好受落喎！
嘟嘟接受大家恭喜，但就猛話自己唔恨嫁，佢話：「個個姊妹都唔接，咁啱個花球又跌落我手，唔通我唔接，由得佢跌落地咩？」佢重話有需要就結婚，冇需要就唔結喎。
問佢呂方係咪冇同佢求婚，嘟嘟即刻反應好大咁話：「你哋老土呀！我老你哋咁多，乜你哋咁老土㗎！」而企喺一旁嘅呂方就嚇到只係識得講唔知，早排甘國亮話呂方肥，呂方話自己唔嬲，重講笑話：「我哋兩個都咁弗，我有做gym㗎！」
好耐冇同觀眾見面嘅伍衛國，前晚出席寇鴻萍嘅婚禮，被問及前女友劉曉慶嘅事，伍衛國就話大家好少聯絡，連劉曉慶要結婚嘅消息都係睇報紙先知，所以佢都冇諗過會唔會出席前女友嘅婚禮，因為都唔知劉曉慶會唔會請佢。而劉曉慶嘅好友鄭明明就講話劉曉慶同男友只係排咗期，未正式註冊，不過佢就知道對方結婚一定會大搞。
名模陳嘉容噚日喺沙田出席一個護膚品活動，佢話遲啲會去北京幫一個髮型品牌做show，而呢個品牌好多時都會要求啲模特兒因應潮流而修剪頭髮，但佢就話自己一向鍾意長頭髮，如果對方真係要求佢剪髮嘅話，就要付出令佢滿意嘅酬勞，佢先會考慮，真係估唔到頭髮都咁值錢㗎，不過人哋係名模，馮仁昭唔恨得咁多。
文頌嫻同王賢誌噚日喺沙田出席無綫活動，文頌嫻入後台時，撞啱有個男人喺裏面換緊褲，估唔到文頌嫻望落斯斯文文，見到男人換褲，竟然一啲都唔面紅，好似冇事發生咁。之後佢重同記者講話：「其實拍外景，不時都會見到男演員換衫，底褲乜嘢色都見過晒，我見慣世面，冇乜嘢呀。」咁開放！唔知佢自己又係唔係隨處換衫嘅呢？
李珊珊前晚同男朋友錢嘉樂一齊去咗上環大笪地出席一個拳賽活動，嘉樂仔識打拳就係人都知，佢重好鍾意睇拳賽㖭，不過就冇聽過李珊珊都鍾意噃，問佢點會嚟啦？點知佢就笑笑口咁話：「嘉樂鍾意睇，我咪鍾意睇囉。」果然係名副其實嘅跟得女友呀，都未過門已經萬事以男朋友為主呀！
沙田馬場噚日舉行「銀袋婦女日」，每位入場人士都會獲贈一個「蝶影駿馬襟針」同一張楊利偉嘅海報，有嘢送黃夏蕙自然唔會執輸。噚日馮仁昭見佢重專登喺記者面前走嚟走去博影相，真係唔到你唔服。Rosemary亦有去馬場，佢係為羅浮宮婚紗舉行嘅盃賽做嘉賓，唔似黃夏蕙咁一心想嚟攞紀念品同出風頭。
