本專欄以不合時宜及Outdate見稱，今日講萬聖節。
在加拿大讀書，總共過了七個萬聖節，第一年唔知啲鬼仔鬼妹喺度搞乜，第二年知搞乜同埋開始覺得好玩，第三、四、五、六、七年，年年都有玩，重愈嚟愈好玩。
當時做留學生，大家都唔係太富貴，但無論幾窮，大家都會籌錢買糖。打扮得鬼五馬六但如天使般可愛的小鬼仔、鬼妹，個個好似公仔一樣，以Cute到漏的聲音齊聲大叫：「Trickortreat?!」收糖的小朋友開心，派糖的更開心。大家真係會絞盡腦汁扮鬼扮馬，務求其他人見到時會嗌聲：「Oh!MyGod!」。北美洲十月底已入冬，就算着皮草扮猩猩都唔會熱，非常有氣氛。最好玩的是大家夠投入，朋友扮成《星空奇遇》的冼樸，過馬路時他以玩具死光槍射向等過紅燈的司機，司機會七情上面地扮中槍開門跌出車，全城一齊玩，你話幾好玩?!
回港後第一個萬聖節，當時已開始做電影，與兩個好朋友入道具倉借架生，我扮古代中箭大將軍，一個扮彈彈吓嘅殭屍，重有一個扮鬼幹部，終於三個儍佬落得一個喺蘭桂坊俾人指住嚟笑嘅悲慘下場，那種感覺極端唔好玩，以後咪搞我。