科拿喺前晚場英超射入一球，幫曼城作客贏修咸頓二比○。點解佢突然咁威？知唔係喺賽前落吧「叉電」囉。
英國《世界新聞》噚日圖文並茂，話科拿喺上個禮拜四嘅凌晨一點，同埋八個隊友蒲吧。本來蒲吧都好正常，弊在佢俾人影到隊酒煲手捲煙之餘，重同個金髮性感女郎濕吻。雖則話佢之後嘅演出冇因為咁而受影響，但佢喺賽前搞啲咁嘅嘢，始終唔係太好。
聽聞曼城前鋒安歷卡因為同領隊基瑾有爭拗，所以喺上場對修咸頓被棄用。雖然基瑾賽後否認有其事，但科拿如果想重振雄風同搶返個正選位嘅話，就應該蒲少啲夜店，畀啲心機練習同埋比賽時，以向基瑾證明自己嘅實力。
列斯嘅澳洲前鋒維杜卡因紀律問題俾領隊列特雪藏，結果冇喺上星期六上陣對阿仙奴。如果佢兩個拗唔掂數，最大鑊肯定係最近四連敗嘅列斯。事關佢哋主力走完一件又一件，𠵱家更淪為弱隊，如果連維杜卡呢個咁有份量嘅球員都走埋，睇怕佢哋下屆定落硬英甲比賽。
NBA波友注意！以後見到丹佛金塊主場比賽，千祈唔好再當佢哋喺魚腩喇！因為金塊繼第一場主場爆大冷以八分打敗上季盟主馬刺後，噚日又喺主場以二十一分狂數上季聯盟二哥帝王。第一次可能係符碌，但係連續兩場主場打敗聯盟兩支最勁強隊，就絕對唔係符碌！
愛華頓新星朗尼前兩日開十八歲生日會，當日出席派對嘅，包括靚女組合AtomicKitten成員Liz呢位愛華頓及朗尼Fans，以及一大班舊同學，可見佢成名之後並冇話唔識人喎！不過前晚對車路士，朗尼一次倒地竟然連褲都整甩埋，重俾電視台拍入鏡，真係醜死怪！
係人都知舒利亞主射十二碼確有一手，點知呢位英格蘭一代射手，喺前晚竟然「老貓燒鬚」，對維拉射失十二碼，令主場嘅紐卡素最後都贏唔到！其實睇番撲出呢個十二碼嘅人，正係前幾年效力新特蘭時亦曾經撲出過舒利亞主射十二碼嘅蘇連遜，兩個都可謂冤家囉！