Santana星期六令維港巨星匯吐一口烏氣，總算第一次爆棚，而且氣氛好好，公務員事務局局長王永平坐喺八方後面，都忍唔住企咗出嚟手舞足蹈一番。
好識走江湖嘅Santana話要彈一首歌，送畀一個佢好尊敬、令到香港世界知名嘅香港人，大家好驚佢講嘅係老董，點知佢話要送畀BruceLee李小龍；原來李小龍過世咁耐，青史留名三十年後，唔知重有冇人咁懷念阿董呢？
Santana都有讚特區政府控制住沙士，唔知楊永強有冇收到。呢啲老牌樂隊唔係靠個樣賣聲色藝，唔係淨識得投靠老細，而係有一種生活態度，追求世界和平，啱晒啲鬼佬口味。
八方聽過唔少投訴話入場太麻煩，兜兜轉轉，前晚身歷其境真係覺得唔夠靈活，點知大會話疏導人流，冇法啦。請佢去睇吓殖民地時代留低嘅馬會，噚日六萬幾人入場，人哋咪一樣咁有秩序，邊使啲觀眾由街頭行到街尾，兜兩個圈都未入到場。
散場時見到着住牛仔褲嘅米老鼠盧同胞同老婆芬妮．黃，忍唔住投訴吓；不過，米老鼠見到咁多人嚟貌似好開心，淨係識得猛咁同人握手。
傳真︰2623-9278
電郵︰