「維港巨星匯」台前幕後，熱鬧非凡，台上巨星嘅演出，分分鐘冇幕後主腦人咁投入。我哋響報紙上，每次睇到打落水狗（詹康信與盧維思兩個外籍人士）新聞，鬧佢哋自把自為，繼而睇到「保唐滅鼠」故事（即保護唐英年，歸罪米老鼠盧維思）。坦白講，如果冇心放料，記者點會寫得咁詳細。
邊啲人放料呢？原來有一批人為咗脫身，費事立法會追查，於是猛放料為唐生辯護，主要有三點：（一）巨星匯嘅來龍去脈唐生唔多知情，係阿松遺留落嚟嘅手尾，（二）合約益晒美國商會之事，唐生未睇過，係阿松簽字（後來澄清係米老鼠簽嘅），米老鼠執行嘅，（三）之不過，唐生努力挽回殘局，唔會卸責，如有公務員失職，會依機制辦理。
發出呢幾點訊息嘅同時，亦抹黑米老鼠，於是有八卦料指米老鼠兩公婆睇騷霸咗成行位，坐喺唐太及朋友之前（其實米老鼠只係預先買咗幾張飛，唐太買飛稍遲而已），等市民產生米老鼠雖然辦事不力但竟然識得弄權嘅形象，以後向佢開刀，就有民意基礎啦。
呢啲放料招數，招招到肉，打到孤掌難鳴嘅米老鼠毫無招架之力。哈，點知就因為招數太厲害，有啲公僕覺得兔死狐悲，有「他朝君體也相同」嘅感覺，誠恐問責局長們個個做快閃黨，搵公僕孭晒鑊，此例一開，以後點算？於是竟然有官員向記者講「保唐滅鼠」，力數啲局長卸膊，點指兵兵就點咗冇有識死嘅米老鼠去孭晒巨星匯，繼而做替死鬼。邊啲官員咁大膽呢？以後陸續有好戲睇。