自從舊年上環帝后華庭開賣後,港島中西區已經好耐無全新住宅樓盤開售,但呢個月有置地綠意居、九建采逸軒,同長實普頓臺同期推出,認真熱鬧。
綠意居因過去兩日率先開放示範單位,吸引大批經紀到場搵生意,同區兩個最快今個禮拜先開放示範單位嘅新盤。
發展商奇招突出,搵人喺綠意居附近派傳單,搶市場注意,普頓臺重出動埋專車兜客㖭,擺明想吸走綠意居嘅客源。據長實講,佢哋準備咗約二十萬份傳單,喺中上環一帶派發,又已經郵寄約八萬份資料畀啲有潛質嘅客戶。
至於采逸軒就搵咗批人,喺會途經綠意居嘅行人路,派發一份有樓盤二至二十九樓嘅平面圖、單位面積等資料單張,搶喺綠意居之前,吸引買家留意。
估唔到𠵱家連單幢樓都出現咁激烈嘅搶客戰。
代理間唔中都會遇到業主轉介親友買樓,但從事樓按轉介嘅經絡集團,都遇到代理行轉客戶畀佢哋嘅情況。
聽經絡集團講,啲三四十年嘅舊樓,佢哋可以搵到銀行承造十五年按揭,重可以做到低過優惠利率減一厘嘅息率,比一般嘅條件好。所以有間同經絡簽咗合作協議嘅深水埗細行,介紹行家幫襯,有好嘢大家分享,可謂守望相助。
至目前為止,同經絡簽合作協議嘅細代理行有三百幾間,比起○一年底時嘅幾十間,多咗唔少。
代理行預期樓市轉勢,積極擴充增兵,利嘉閣前兩日喺機鐵青衣站搞招聘會,執行董事廖偉強話,請咗五十人,當中一成半有大學學歷。另外重有四十名會預約再次面試,估計最終有七十名新血加入。
廖偉強透露,計劃緊第二次大型招聘會,相信日內會有決定。
另外,早前蘭西提到中記代理李日開結婚當日都去開單,原來件事重有下文,聽講地產代理監管局行政總裁陳佩珊得悉之後,親自寫信讚揚佢嘅服務態度。各經紀好學嘢嘞。
港人近嚟重燃買樓興趣,四出睇樓,若自住嘅當然希望搵設施、景觀、校網同空氣質素等都好啲嘅單位啦。蘭西聽講,香港某大學一班教授,做咗個有關空氣污染嘅研究,可能對置業人士揀樓有參考作用。
研究內容係睇吓啲污染物點樣影響本港,由邊度嚟,邊處嘅住宅最受影響。結論自然會牽涉到邊度最好住同最唔好住啦。作為買家梗係想知啦,但係若果發展商喺空氣質素差嘅地點有樓賣,咁就真唔知點好嘞!
長實位於上環嘅普頓臺,已接近現樓,發展商開始為物業粉飾,噚日下午蘭西喺現樓,巧遇負責賣樓嘅助理營業經理梁焯鏗,據佢講,種喺大門旁呢一棵海棗樹,專程由海南島運嚟,價值約三十萬元。
棵樹高九米,有成三層樓高,樹冠部份,直徑有五米闊,梁焯鏗話,種呢棵樹,係因為佢好有生氣,同時又襯樓盤大門地下嘅紅磚顏色。
普頓臺有部份單位可自製成18個相連戶,據梁焯鏗透露,今次就考慮留番個命名權畀買家。
蘭西
電郵地址: