中國太空人楊利偉訪問香港，慘遭四方別有用心嘅人士爭相抽水，由民望低落嘅阿董，至到7.1後搏晒老命想香港人患上局部失憶症嘅民建聯，一見到有偉哥到，就爭住執嚟食，個個都「成功邀請」得空間宇航飛行者楊利偉同志訪問香港，將我哋炎黃子孫最大驕傲嘅偉哥，無限量政治化、攝石化、春藥化。
或者因為站得高，看得遠，偉哥上過太空之後，眼光唔同凡間嘅見識，一嚟到香港，由汪阿姐嘅香吻、成龍嘅熊抱，至到俾阿董同民建聯伸手摸揸到全身一撻撻，佢始終以大局為重，不單止冇發爛渣，啲對白鬼咁煽情，重不惜做埋「自由行」一分子，參觀維港，可惜噚日一片迷霧，呢個城市，阿偉哥佢睇到幾多真相，咁就唔知嘞。
不過，講到資源善用，阿董、民建聯同埋特區政府，又始終有少少浪費咗件國寶。例如，叫楊利偉親自同民建聯洗樓派傳單。喺大球場，高呼「我支持23條立法」，話畀全香港人知，佢喺太空艙，處於失重狀態，啱啱射入太空軌道嗰陣，諗到嘅第一件事，就係擔心國家遭到外力顛覆、國土唔可以分裂，同埋一定要消滅法輪功。而佢當日帶入太空艙嘅各項紀念品，就有一本特區政府嘅23條立法草案。
最後，叫阿偉哥緊握拳頭，學霍老當日咁嗌：「我挺董」，嘩，相信阿董嘅民望，一定會即時加強硬度呀。
阿董哋浪費資源，反為畀成龍一個"lam"盡風頭。積奇．陳同楊利偉十指緊扣咁登台，已經令人覺得有少少打個突，積奇．陳重同偉哥一齊力竭聲嘶咁唱歌，更遭到某啲刁民猛噓，嫌阿積奇大聲過楊英雄。如果諗住用積奇拍住偉哥，可以加強香港人嘅自豪感、凝聚力，咁又未必有效，因為積奇生性風流，同阿綺莉姐婚外生埋女。
八方聽到有人報料，喺觀眾席上，有個阿媽帶住個五歲幼女，指住佢兩個雞啄唔斷咁教個女：「阿女呀，你大個咗嫁人，嫁個樣似矮嗰個好啦，佢始終老實啲，個鼻細啲，呢亭男人一定唔會偷食，上到太空只係得一頭家一個仔，喺地面開咪嗌佢做老竇咋……」
個囡囡一路"lam"緊個甜筒，一路眼光光咁聽住台上兩大大哥唱緊《男兒當自強》，現場一片嘈雜，阿媽呢一番苦口婆心嘅教誨，佢年紀咁細，收到幾多，就無從稽考嘞。
傳真︰2623-9278
電郵︰