上周六打波見到經紀黃，見到佢冇厘心機，原來因為建滔化工（148）收購秀華國際（567）失敗，秀華股價上周五急跌令佢輸錢，所以心情唔多靚。
秀華上周五急跌22.22%，收0.35元，成交股數659萬股，金額237萬元。不過，建滔就反而上升4%，收10.40元。
經紀黃話，基金界早前有傳言，話建滔收購完秀華之後，會將印刷線路板業務注入秀華，然後建滔將會投資其他化工業務，因此佢亦唔執輸，一早買定貨等運到，點知最後竟然唔成事，真係喊得一句。
據講，收購最終傾唔成，主要歸咎於買賣雙方都係財技高手，冇人肯蝕底所致。不過，對於建滔而言，買唔成秀華應該影響有限，近日重有外資大行唱好，話佢有機會入選大摩指數成份股。
另外，經紀陳同小初講，不妨留意剛剛公布1供1，每股供1仙的廣益國際（530），佢話人哋唔係等錢使要供股咁簡單，聽聞係因為有位久未露面嘅股壇猛人重出江湖。
慕容小初