翻閱資料，發現黃秋生絕少提及家庭，他解釋：「咪又係咁，一個普通屋企，得閒會同七歲嘅𡃁仔踢吓波、食吓飯、游吓水，乜嘢都有囉，一般正常人咁。」不過秋生坦言兒子非常敬畏他，不過仍常常跟他吐心事，兩父子相處得非常融洽，然而兒子甚少看秋生主演的電影，他說：「佢重忙過我，要學呢樣，學嗰樣，邊有咁多時間？」
另一方面，秋生的緋聞亦不算多，他說：「我咁嘅樣邊有女性留意，同埋𠵱家拍戲，三、兩日就拍完，一開工點頭打個招呼，跟住已經拍完講拜拜。淨係試過有次去電台做訪問，個主持問我個女明星（對方叫甚麼名字已不記得）靚唔靚，我梗答靚啦，唔通話人哋唔靚咩？佢重畀個電話號碼我，跟住就話我對個女仔有意思，約人去街，都黐線㗎，我轉頭都唔知將個電話號碼丟咗去邊啦！」
當日跟黃秋生在山頂的白屋做完訪問後，由於現場只有借來拍照的一輛車，理應要分兩次才能將我們一行人送返凌霄閣，再轉乘其他交通工具離開，但秋生二話不說，竟以做運動為由，讓座予筆者和攝影師，他自己就與助手從山頂白屋步行十五分鐘至凌霄閣，當日筆者沿途望着他大汗淋漓的身影，要堂堂影帝讓座，真的鐵漢也有柔情。
撰文：馮美茵 攝影：林德雄 鳴謝：HarmonyMotors.Ltd 服裝提供：Joyce 化妝：DorisMak