豐田Estima（即港版Previa）唔單止係一部受車迷追捧嘅MPV，由於車廠替其設計有唔少配件推陳出新嘅關係，令呢部熱賣嘅MPV有不同嘅新版面世；而最新EstimaAeras-S3.0V6特別版，唔只有一身跑意盎然嘅造型，加上跑車軚環連半自動波箱配搭，重帶出多一份跑意呢！
記者、攝影：陳偉林
車輛提供：富利堡汽車（23330747）
豐田Estima憑住既年輕又富活力感嘅造型，加上不少改裝公司為其安排有多種改裝部件，而廣受車迷歡迎，當然本港坊間不少獨立車行，亦引進咗加入全車包圍，又或者係最新、最豪設備嘅特別版供用家選擇，難怪多年來仍響MPV市場上穩佔一席位啦！
為迎合一班喜歡動感包裝嘅用家，呢部新版Estima改換咗全新大包圍連氣霸，賣相倍見惡形惡相之餘，四輪重用上最新原廠17吋跑車合金胎軨，還有多盞式LED尾燈、大尾翼連High-mount煞車燈配搭，加埋車窗雨擋、頭玻璃整流器，以及門邊電鏡連方向指揮燈，單係呢一身造型，已教人有深刻印象。
唔少人追求乘坐貼身享受，而新車三排八座位就用上歐洲車剪裁嘅皮椅配搭，加上雙電動趟門、雙天窗組合，還有多功能AV系統連屏幕、前後恒溫冷氣、獨立房燈等編排，置身其中愜意又舒適。
新車沿用一台3.0公升V6偈，匹配4前速半自動波，大可隨意改換成手波車操控，好玩之餘新車重有唔錯嘅操控同循迹感，而一套四輪碟煞，匹配ABS連EBD裝置，重每有收放自如嘅反應呢！
記者評語
呢部加裝有全車包圍嘅豐田EstimaAeras-S3.0V6，望落好有跑車Feel，而高級真皮座椅及全新AV系統組合，亦能令享受程度更上一層樓呢！