前星期好友慘被挾倉，上周輪到挾淡友，「特區正苦」打壓本地華資經紀，令金魚缸變咗洋人世界，班大鱷頻頻入市㩒錢，搞到港股升跌無常。
呢排美股喺業績公布期下愈升愈有，港股都有類似現象，邊間有業績公布嘅話，股價就夠堅挺，好似隻TCL（1070）咁，升極重有。由於有唔少公司會陸續喺11月公布業績，不如留意下啲就快公布業績嘅股份，分分鐘有意外之喜。華燊燃氣（8035）11月中會公布業績，由於國內對於燃氣嘅需求持續上升，加埋新收購項目話開始有盈利貢獻，所以傳佢哋今次公布嘅季度業績將會較去年同期升起碼5成，又話今年全年業績會重好。
睇番上個禮拜五，華燊由9毫3飆到收市時嘅1蚊，完全係對辦走勢，有朋友話，今次隻股喺正個大市嘅升浪頂起步，喺班炒開大藍籌嘅資金換馬下，會輪到啲細眉細眼嘅股仔發威，只要個市唔跌咁多，隻股仔重會有排炒，首個目標聽講係1.20元。
呢排除咗興玩炒業績外，重興玩批股，之前由1毫樓下炒上嚟嘅御泰國際（155）上個禮拜突然停牌，惹起批股疑雲，不過喺進一步打探下，原來今次係有好嘢公布，隻股不但冇喺市場抽水，重分分鐘有機會提早向股東派聖誕禮物。有線人話隻股啱啱同國內人士簽咗合約，高價賣咗手上嘅國內光纖主幹，重話會收返3億幾現金，即係話單交易可以為股東帶嚟每股2毫3現金，用停牌前0.165元嚟計，要炒返上2毫都唔奇。
伏勝