星期日，一家大細飲完茶百無聊賴想去郊外呼吸清新空氣，細佬想睇花草樹木認識大自然，哥哥就好貪心，想又玩又食，媽咪就話至緊要唔使點上山落山。最後由一家之主拍板，一於來個坪洲環島遊，一次過滿足晒各人嘅要求！
記者：鍾可強 攝影：楊錦文
Model：Ellen、May（RichStrategy）
好多人都以為面積只有一平方公里嘅坪洲唔慌好行，實情呢個位於香港島以西，大嶼山以東嘅腰果形小島，真係麻雀雖小，五臟俱全。加上佢擁有一個可360o遠眺離島景觀嘅無敵靚位，絕對值得到此一遊。更何況，行坪洲至啱香港人嘅心急性格，樣樣要睇又要快手。基本上，將坪洲最正景點掃勻，大約五個小時已綽綽有餘。
嘩！個樣真係好似史諾比！今日就將佢命名為「史樂比石」，將來可在此遠眺米奇老鼠屋企！
由中環去坪洲，最快的船半小時就到。落船後最好先走左手面路線，即從坪洲北面玩起，因為西南方睇日落至正，當然留待黃昏欣賞。第一站本來係參觀海水侵蝕灰渣堆積而成的「灰渣洞」，可惜有地盤工程，通往景點的路被封閉，暫時無法參觀。
唔使失望，上山走過連島沙洲，呢度正孕育住一個潛質優厚嘅觀景點，因為遠方嘅大嶼山竹篙灣，正是日後迪士尼公園所在地，落成後喺坪洲釣魚公石，將可以盡覽迪士尼全景，當然能夠睇埋夜晚放煙花啦。連島沙洲有一嚿貌似史諾比側面嘅巨石，就將佢命名為「史諾比石」啦！將來坐喺呢度就可以伸長條頸搵米奇老鼠嘞！
唔好忘記要影張相留念，事關呢個景觀，將會出現劇變，三年後，迪士尼就會誕生，到時再嚟呢度影一張比較吓，你就知道乜嘢叫做十年人事幾番新！唔使感慨喎，到時你可能已經拖住另一半走嚟補相，又甚至已經帶住一個兩歲大嘅仔嚟行山也未可料呢。
唔好諗咁遠嘞，行落東灣休息吓先啦。沿風水林及竹林走往東灣，會見到不少綠色植物。而最頂癮嘅，當然係一種由坪洲市民命名為「李嘉誠果」嘅山棯。坪洲嘅綠化土地佔全島面積70%，擁有不少奇花異果，除咗周島都係嘅玉麒麟外，更有人氣高企嘅山棯，個個用嚟當補品，搞到呢度啲山棯見一個冇一個！不過唔好有樣學樣，見野果就摘嚟食，有啲會有毒㗎！
算啦，食唔到「李嘉誠果」咪落東灣搵茶餐廳開飯囉，行咗咁耐都肚餓啦。東灣嘅岸邊有燒烤場，對住全東灣海景，想喺度燒嘢食，肯定要晨早走嚟排隊，得六個爐咋，老友。冇位？唔緊要，行番出碼頭大把嘢食，順便睇吓有乜手信買。記住，午飯唔好食得太飽，坪洲至正名勝景點手指山，足足有九十五米高，小心行到嘔。
好嘞，全日最精采嘅節目終於來臨，雖然手指山並唔係太高，但因為地理位置獨特，擁有360o全景觀視野，東望香港島西環石屎森林，南望南丫島及長洲，西望大嶼山愉景灣及竹篙灣，即迪士尼樂園，北望青馬大橋九龍西遠景。唔使你登上勁高山峯行餐死，已經有咁精采嘅全海景，咁你話係咪值得坪洲人驕傲。
難怪呢個小小離島嘅居民有兩樣自負嘅事情，第一當然係個個由細行到大嘅手指山啦，另外就係「沙士」期間坪洲屬零感染地區，空氣好真係唔同啲嘅。當你企喺手指山嘅山頂鳳萍亭，你就感到人間仙境係乜嘢一回事。雖然現時秋季不時出現煙霞，令天色白濛濛一片，無法欣賞到水天一色嘅蔚藍美景。但無遮擋嘅海景加上悠悠山風，已教人不想抽身而去。
於中環港外線六號碼頭坐渡輪往坪洲。四十五分鐘一班船，大船船程四十五分鐘，飛翔船半小時。
