「假作真時，真亦假」，今個星期兩套新出DVD，都大Sell立體電腦動畫特技；《變形俠醫》名著漫畫真人處理！《海底奇兵》原創動畫電影，虛擬澳洲真實大堡礁；兩套都係今個暑假檔猛片，一出DVD馬上大熱賣！
記者、攝影：朱崇德
今個暑假檔大熱片《變形俠醫》，落畫冇耐咁快就出DVD！夾住大片之勢，旺角好多DVD舖都話佢係本周最好賣DVD！故事內容耳熟能詳，科學家布斯賓勒在進行實驗中，受過量伽瑪射線影響，使他發嬲時會變成無堅不摧變形俠醫！今次電影版同以往舊電視版最唔同處，係導演李安加入咗好細緻心理描寫，唔似一般鬼佬片拍法，一味官能刺激齋Sell特技，有深度好多！
講開特技，本片使用了荷李活最新ILM視覺效果特技，基本片內所見到嘅「綠色巨人」，都係由電腦動畫製作，最經典莫如近尾場變形俠醫變回人一幕，電影史上《變形俠醫》片集中未有真人版拍得咁細緻！聲效都係基本嘅dts5.1聲道，不過做得幾靚，其中由地底軍事碉堡，打到去沙漠坦克大戰同大峽谷對戰直升機，係全片最正聲、畫享受之處，5.1環迴效果四周游走！
Disc2的《TheUniqueStyleOfEditingTheHulk》，會將變形俠醫各部份作互動解構。
製作：UniversalStudios
發行：年代影視
區碼：3區
價錢：$148
《反斗奇兵》、《怪獸公司》原創班底PIXAR製作嘅《海底奇兵》，日前亦已有DVD碟見街；夾住今個暑假檔締造出──史上全球最賣座動畫電影驕人成績，一出碟馬上成本周最好賣DVD第二位！今次故事會帶領觀眾潛入澳洲大堡礁，講述小丑魚Mo仔意外被人類捉走，做爸爸的馬倫大為着急，因而展開了一幕千里尋Mo冒險之旅；父子親情寫得非常到肉，為子女者睇可感受親情至真，為父母者睇更是笑中有淚，間唔中重可能見到自己的影子！
上次PIXAR在《怪獸公司》已向難度挑戰，製作電腦動畫之噩夢──毛髮，今次再進一步將難度升級──海洋，困難處係要有水嘅無重力，但又要有質感！加埋海水折射同光源變化，睇完真係令人非常折服！
Disc1、2都會虛擬魚缸，配埋Plasma大電視，5.1聲道水流聲，真係以為屋企多咗缸魚。
製作：WalyDisneyPictures
發行：洲立影視
區碼：3區
價錢：$148