上個星期行過黃金場，竟然見到有舖頭擺咗幾款韓版PS2遊戲出嚟，初時以為梗係老翻啦，再問真原來間舖頭老細剛去完韓國玩，順手買返嚟香港試反應，其中有隻韓國SCEK開發嘅《AXELIMPACT》真係幾好，畫面夠華麗玩法又特別，可算係炒車版《GT4》。
萬聖節就梗係周圍都鬼聲鬼氣啦，唔睇吓鬼片，又或玩吓恐怖Game應吓節點得呢？之前玩《Zero零》同《BioHazard》都唔夠激？不如試吓下星期PS2隻《SIREN》（屍人），感受另類核突恐怖感，不過暫時只得日文版，中文版就延期至下年年頭推出。
至於本周都有唔少遊戲推出，《太鼓之達人3》同《GIJOCKEY2003》都有唔少擁躉，而隻《炎多留魂》就玩男性友情遊戲，夠晒另類，不過鐵人就真係要講講其中至廢嘅Game《變形金剛》，雖然鐵人本身對隻Game冇乜期望，但係動作Game都冇理由咁廢，動作生硬加每關一樣，就算係變形金剛Fans都頂唔住，奉勸大家可以慳番筆錢。
文：打機鐵人
