中國第一個升空太空人楊利偉噚日出席大球場嘅歡迎會，吸引四萬市民出席，而來自中、港同外國嘅記者，大大話話都有成百人，場面鬼咁墟冚。不過，八方以記者身份入場嘅時候，無端端要簽一份承諾書，唔簽就冇得入；八方覺得唔妥，就睇睇承諾書寫啲乜，發覺原來係一個「陷阱」。
承諾書上寫明好多規條，包括電子傳媒只可以喺採訪錄影當日同翌日（共兩天）內嘅新聞報道內播出，而且播放時間唔可以超過四分鐘。文字傳媒方面，攝記影相時唔准用閃燈；重寫明如有違反而令負責製作嘅無綫有損失，就要承擔法律責任，即係要賠償。
八方見好多記者為咗入場採訪而簽咗承諾書，但係一啲醒目行家就死都唔簽。大會公關及宣傳部召集人龐愛蘭即刻出嚟解畫，話承諾書所有守則都係無綫定落嚟，重話自己只係按本子辦事。不過，八方同幾個行家就死都唔肯簽，擾攘咗成半個鐘，最後龐愛蘭讓步，話就算記者唔遵守承諾書上規條，都一定唔會追究，記者先肯入場。
搞到不歡而散，記協主席張炳玲話，呢單新聞咁重要，唔應該限住播幾多分鐘同用唔用閃燈。希望無綫吸取教訓，第時唔好再搞啲咁嘅嘢。
（圖）採訪楊利偉大球場歡迎會嘅記者，入場時都被要求簽承諾書。
傳真︰2623-9278
電郵︰