黃秋生憑着自信和精湛演技，在影圈甚為吃香，獲獎無數的他認為自己今天的成績只屬起步階段，將來的成就會怎樣，自信的秋生自言難以預計。至於會否進軍荷李活，他表示自己紮根香港，故不欲長時間遠赴當地，做「公關」工夫等拍戲。
好演員，除了要懂得演戲外，還要擁有自信。這份自信，就是當你接演一個角色，不理電影是好是爛，劇本如何平平無奇，你都有信心將它化腐朽為神奇，個人表演得淋漓盡致。黃秋生身上就散發出這份懾人的自信，令他在影圈吃得開。
問秋生演戲的秘訣，他說：「點解我咁好戲？因為我去學囉。我係去演藝學院學做戲，學完梗係要用番出嚟啦，醫學院出嚟都要去實習啦，唔學就一定唔得。」
這份自信不是與生俱來的，而是經過歲月磨練。秋生出身自亞視藝訓班，畢業後參演電視劇多年，其後到演藝學院讀戲劇，接着又重投電視圈，輾轉踏入影壇，前後共拍了二百多部電影。在秋生眼中，過去是艱苦和辛酸的，他說：「真係慘，梗慘啦，自己條命唔好，比其他人兜咗好大個圈。有人做一部戲就紅，但自己做十部都唔紅，真係好大困難，好大風大浪，但就好似學會航海技術咁，人哋遇唔到嘅嘢，我遇到。」
那可有一刻想過退出？秋生說：「做電影時有一陣子諗過唔做，但點解冇走？因為朋友囉，我哋呢啲唔做呢行咁點呢？」說起入行，原來秋生起初不想當演員，他說：「我冇諗過入呢行，最憎呢行㖭，因為都唔知演員係做乜，邊有人知演員係乜嚟㗎，都係偶然之下先入行，但你問我當時究竟想做乜？我真係唔知噃。」
無心插柳柳成陰，今時今日的秋生在影圈炙手可熱，脫離了接拍爛片的生涯。昔日的秋生為了生活，為了金錢，就算劇本、對手和導演如何不濟，都照接可也。今日的秋生縱然仍是負資產一族，但已能從容地向外表示只會選拍好的電影。
問秋生覺得自己在影圈的成就如何，他認真地說：「啱啱至開始咋噃，梗係啦，以前係準備之嘛。」如果說曾憑電影《人肉叉燒包》和《野獸刑警》奪得香港電影金像獎最佳男主角，憑《無間道》奪金像獎最佳男配角，並以《千言萬語》成為金紫荊影帝等，均只是他口中的準備階段，那怎樣才叫做巔峯呢？會否想過赴荷李活發展呢？
秋生坦率地說：「我唔知可以有幾高，呢樣嘢冇尺度！至於過荷李活？唔使啦，我拍過荷李活嘅戲《飛龍再生》，過咗去我會有啲乜呢？香港係我嘅基地，就算要過去拍，都唔需要去嗰邊等一年半載籌備，因為其實都係飲飲食食，做啲公關工夫，根本唔係籌備緊一部電影。」
水銀燈後的秋生，總予人很酷之感，不僅常常發表偉論，還出過三張唱片的他，大唱粗口歌，大鬧政府，內心似乎擁有一團永不熄滅的火燄。
秋生對此說：「人係應該有意見，一個正常人唔係應該有意見咩？讀書人唔係學分析、表達意見嘅咩？人係要有見解，呢個圈啲人點解唔似我？佢哋係唔講定唔識講呀？我懷疑係唔識講多過唔講囉。」
