加大碼鞦韆，一次過坐成四、五個小朋友在搖搖擺擺、還有繩網和鋼架……逾3千呎的地方放了約40件這樣的大玩具！以為來到了室內遊樂場，但小朋友卻說他們在做Gym！細路都識做Gym？聽落都幾有趣。所以幾個自命身手不凡的小蘋果會員，自告奮勇話要率先試玩這所全新的兒童健體樂園。
記者：月桂樹 攝影：阿力屎
急住想玩的小朋友，一早就起清健體樂園的底細。原來這間兒童Gym場有20年歷史，將遊戲及普及體操互相融合。見香港的小朋友活動空間和時間都少，便首次踏足香港，希望帶給小朋友多方面的康體活動。這裏的健體遊戲適合6個月至6歲半的兒童參加。樣樣都專為細路而設，好似阿拉丁飛氈、熱狗鞦韆、高低槓、平衡木、以及遊樂場必備的搖搖馬及繩網等。最開心係每個星期都會更換各樣「大玩具」的布置和擺法，而且好多設施又可一身幾變，同一道具有多種玩法，包保細路仔玩極都唔悶。
每堂一開始，當然要做熱身鬆鬆筋骨。音樂一起，導師就帶住小朋友彈彈跳跳，只得5、6歲的小朋友，起初有點不知所措！點解？因為這裏的導師全部說英語，搞到有一、兩個細路儍儍吓，動作總係慢半拍！不過細路仔的適應力很強，跳完一Part熱身舞，個個都已經㷫烚烚，忽然好似全部聽得明啲英文講乜，真搞笑！
場內不少設施原來是收藏起來的，不消兩分鐘一經安裝，便又變出多種玩法，真得意！尤其是那個鞦韆，閒閒哋都有三、四種玩法，小朋友見到即刻癲晒！
利用吊繩吊起大軟墊便變成熱狗，好考小朋友的平衡力。若果一個小朋友向前、一個小朋友向後、一個又坐唔定，都會影響鞦韆搖動。
吊繩上安上木棍的鞦韆，便可玩空中飛人。有跳舞底子的汶騫，輕易做出倒吊動作。但當導師一鬆開手，即嚇到嘩嘩叫！
對於小朋友來說，翻觔斗絕對容易。這個有兩個小斜台，中間又有一個大波嘅喺乜東東？唔好睇小佢，只要懂得運用，可以有好多變化，又可以對小朋友進行不同程度的訓練。Tiger仔平日玩翻觔斗，絕對難唔倒佢，不過當佢見到有個無敵大波喺身前，就即刻耍手擰頭。「有成半個人咁高，我實跨唔過！」幸好在導師又抱又攬的情況下，最後也能完成翻觔斗。導師話這種訓練對將來做空翻動作很有幫助。
小朋友比較容易做到的，可算是高低槓和平衡木。這兩種器具都就着小朋友的高度而設，平衡木更可調校不同的高度，而高低槓又可選擇只玩一條桿或玩晒兩條桿。在導師指導下，小朋友都做到一些基本動作。這兩樣玩意小朋友都在體操節目上見過，如果自己都玩到，對增強自信和培養膽量都相當有幫助。
玩家心聲
MyGymChildren'sFitnessCenter
對象：6個月至6歲半兒童
課堂：$1,600/10堂（每堂1小時，6-11個月大的幼兒班每堂45分鐘。每班最多15人，並有3位導師。3歲半以下為親子班，家長可陪同上課。另設1堂免費試玩優惠，詳情可致電查詢。）
地址：中環雲咸街60號中央廣場2203B室
查詢：25773322
