馮仁昭四圍超：
華仔出唔成碟帶千歌迷台北散心

劉德華噚日做領隊，帶住香港一百個歌迷去台北，會合當地八百五十名歌迷，一齊參加三日兩夜嘅旅行團。華仔此行原意係宣傳Baleno同新國語碟《大人的情歌》，本來佢隻新碟前日推出，不過臨時又出唔到，華仔一心預時間為唱片宣傳，結果唱片延期，馮仁昭諗華仔或多或少都會唔開心。

「我嘅部份完成咗」
華仔噚日帶住成千個港台歌迷喺台北出席簽名會，問到華仔點解唱片會出唔切，佢話：「我好被動，我嘅部份就完成咗，其他嘢要問番唱片公司。」問華仔可擔心出唔到碟，佢話：「冇可能，有冇咁危險？」華仔可怕歌迷失望，佢話：「我人都嚟咗台灣，出唔出碟都一樣。」
據知華仔好緊張隻新碟，佢一早預咗十日做宣傳，但𠵱家所有嘢都打亂晒。唱片公司高層伍曼英噚日喺電話訪問否認係唱片公司問題，佢話：「華仔冇期宣傳，唱片公司會同華仔經理人度一個好宣傳期先出唱片。」
而鄭秀文（Sammi）噚日亦喺台北宣傳國語唱片，歌迷嘅聲勢，絕對唔喺華仔之下，但佢做訪問時，竟然畀台灣記者話佢國語退步咗。

方力申着禮服會Stephy？
方力申（Alex）噚日喺商台舉行佢入行以嚟第一次嘅個人音樂會，重請咗好友鄭中基同緋聞女友Stephy到場，佢同Stephy合唱新歌時就表現得好唔自然，但事後Alex就話大家冇尷尬，重講笑話公司搵啱佢哋做螢幕情侶㖭。不過馮仁昭奇怪佢點解要着禮服開音樂會，佢解釋話因為咁啱有朋友結婚，搵佢做伴郎喎。

李蘢怡要靠機器挺胸
前晚李蘢怡（Tiffany）喺尖沙嘴宣傳新片《咒樂園》，佢嘅上圍一向好豐滿，但前晚好似縮咗水咁，Tiffany話：「唔係，我着衫遮咗，費事太張揚，呢度咁多人。我都唔擔心胸大會受地心吸力影響，因為我係修身堂代言人，佢哋會幫我用機整得挺啲。」Tiffany咁後生就要用機整先挺，咁咪好大鑊？

黃夏蕙做鬼至受歡迎
前晚係萬聖節，黃夏蕙特別化咗一臉鬼裝，又着上蝙蝠黑衣現身，佢喺中環嘅街頭扮鬼扮馬，大受歡迎，除咗有不少年輕人見到佢高呼佢做「夏蕙姨」外，亦有好多外籍人士爭相上前要求同佢合照，連小朋友都唔例外，馮仁昭心諗，夏蕙姨咁受歡迎，應該唔係因為外籍人士認錯咗佢係鬼啩！

趙文卓一定撐阿梅開騷
趙文卓噚日喺台灣宣傳時，同記者講話前女友梅艷芳嘅演唱會，佢一定會爭取返香港出席，佢又話自己一直有同阿梅保持聯絡，重同阿梅講，只要佢自己克服到，就一定冇問題。趙文卓透露阿梅嘅身體現時還可以，只不過外界畀佢太多壓力，依馮仁昭睇嚟，趙文卓雖然同阿梅分咗手，但其實重好關心阿梅。