新一代日產Urvan自推出以來，憑着其實用性強及一台3.0公升Turbo偈嘅強勁表現，而備受用家讚賞；然而，原來有不少改裝公司，都有為其推出多種唔同嘅改裝部件，務求令車子響車群中突圍而出。難怪我哋今日介紹嘅呢部UrvanTurbo，其車主文哥都話部車多嘢改之餘，又夠晒實用啦！
記者、攝影：李志強
新車售價：$169,800（標準版）
查詢：合誠汽車（28035333）
用家文哥最近為新購入嘅日產UrvanTurbo加裝咗VRS放氣嘩佬（約$2,500連人工），佢話部車本身一台3.0公升柴油Turbo偈，本已好力（馬力：121ps/3200rpm；扭力：27.0kgm/1600-3200rpm）又慳油，家陣裝埋放氣嘩佬，引擎嘅呼吸變得更暢順之餘，而且重可以保護一組Turbo裝置，同埋好有揸跑車嘅感覺㖭！另外，文哥重有意為車子加裝門邊電摺鏡、電鍍鬼面罩及Turbo表等配備呢！
文哥又覺得UrvanTurbo嘅車廂空間好寬敞，擺放大量貨物都不成問題，低重心及左右雙趟門設計，重好方便上落貨㖭！座艙乘坐舒適性亦見不俗，加上齊全設備，就算要作長途行車都無有怕；而文哥部車更加有NISMO車身貼紙（約$1,500連人工）及門邊雨擋（約$200連人工），望落真係有型得多㗎！
