胡關李羅喺行內無人不曉，係大型地產發展商御用律師行，噚日慶祝成立三十周年，除咗法律界猛人包括終審法院首席法官李國能、律政司司長梁愛詩等出席，地產界大孖沙簡直係排住隊到，包括長實主席李嘉誠同大仔李澤鉅、新鴻基地產副主席郭炳江、恒基主席李兆基同細仔李家誠、南豐集團主席陳廷驊等。
唔單止大孖沙，誠哥一班曾經叱咤地產界嘅舊部屬，包括周年茂、洪小蓮等亦有露面，周年茂重同舊拍檔洪小蓮握手寒暄，但就唔係好覺佢同舊老闆敍舊。
老一輩嘅地產大孖沙就真係趁酒會同老朋友敍舊，好似四叔李兆基喉嚨唔舒服，講唔到嘢都到，誠哥亦不停同人交換卡片；反觀新一輩地產人，郭炳江逗留唔夠十分鐘就鬆人，唔知係咪因為同胡關李羅相熟嘅，係佢伯爺郭得勝呢！
傳真︰2623-9278
電郵︰