早幾個月家用機嗰邊靜到飛起，但踏入11月新Game馬上嚟，連出兩隻大作，好消息係《TimeCrisis3》出PS2版，大家唔使再去機舖日日進貢！另外新世紀會出隻《SHINSEIKIEVANGELION2》，3D立體模擬戰鬥加碇真嗣育成，EVA終於有隻似樣啲嘅Game！
記者：朱崇德
槍Game名作《TimeCrisis3》，唔經唔覺已經去到第三代，今集嘅街機Mode都係用番Alan同Wesley兩個做主角；一開首睇見佢哋兩個着晒夏威夷裝，坐遊艇喺地中海小島釣魚，以為好悠閒，原來佢哋都係為咗VSSE工作，偽裝潛入恐怖分子霸佔的國家進行反恐行動。
今集兩位主角的火力明顯較前兩集重裝備了，以前只得支手槍同間唔中有支機槍使吓，今集就增加到4支之多！手槍無限發是基本配備，而UZI輕機槍、散彈槍及彈炮，就可以從殺死黃衫的敵人中取得彈藥（限彈數）！
配合GunCon2的優勢，今集都一樣加入前作的迴避系統，在不按掣的情況下，玩家會利用周圍的地理環境擋彈，任射都冇事！不過《TimeCrisis》的要旨，當然係同時間競賽啦！咁樣一味懦夫龜縮，愈打到後排，你會發覺時間會愈唔夠使，一樣死路一條！
論畫面移植度，真係有街機9成以上水準，而且聲效都好正，槍聲、爆炸聲同背景音樂，都令人打得好投入；不過超正係對應嘅專用GunCon2認位超準！而且用㩒掣進入迴避狀態，比街機用腳踩真係反應快好多，打起上嚟更得心應手，出咗家用Game之後，相信街機真係一定拍烏蠅！
家用版直Dub街機當然唔夠睇頭啦！所以遊戲內加了家用版獨有的危機任務「CrisisMission」及拯救任務「RescueMission」。街機模式應該可以半個鐘打完，緊接玩家可以打危機任務，內容使用類似外傳性質，以7日7個任務，講述Alan同Wesley的外傳故事，而且所有場景街機Mode從未見過，使遊戲耐玩性大增！
拯救任務更特別，反傳統起用新女角AliciaWinston擔大旗做主角，遊戲場景雖然會同街機一樣，不過由於數線改變了，敵人火力增強了，難玩度大增！另一過癮處作戰時間會變為黑夜，而且敵人槍械會有SureFire在槍頭，被它們一照會令你有目眩效果，好有WarGame感；話明拯救任務當然要救人啦，你嘅工具會係一支有Zoom功能的Sniper槍，玩法真係變化很大。
如果想親身一試《TimeCrisis3》有幾好玩，嚟緊24-28/12喺會展舉行嘅AsiaGameShow2003，會有首次公開試玩，買Game不妨可以試真啲！
(C)19951997200120022003NAMCOLTD.,ALLRIGHTSRESERVED
《新世紀福音戰士》都完咗幾年，不過EVA熱好似都未有冷卻，《SHINSEIKIEVANGELION2》未見街，已經一大班死使日日落場問價問推出日期！
今次遊戲都同以往一樣，都係以Simulation類型推出，不過就加入埋育成成份！遊戲故事會由第三使徒入侵第三東京開始，一開始碇真嗣就被迫駕使初號機同使徒搏鬥，一般情況下是以類似戰棋遊戲畫面進行，不過一埋身打就會有3DEVA畫面，真實度隨時重幾正過睇電視版（可惜畫面時間較短）！最圓滿係會打到去13使徒，想從另一角度了解Eva結局，今次真係不容錯過！
另外，在唔打使徒的日子裏，玩家會進行碇真嗣的育成遊戲，令遊戲的可玩變數大大增加。
SHINSEIKIEVANGELION2
發售日：11月20日
開發：Bandai
類型：Simulation
售價：$415（行貨）
Copyright(c)GAINAX/ProjectEvaTX
