有線電視今年開台十周年，昨日在金鐘太古廣場舉行酒會，楊紫瓊、肥媽瑪利亞、李珊珊和吳君如等齊往捧場，楊紫瓊更大談好友梅艷芳的病況。
阿梅早前承認患上子宮頸癌，她日前接受訪問時，聲線顯得十分虛弱，楊紫瓊說：「我都同阿梅通過電話，佢冇事，佢不嬲都咁瘦，近排已經肥番，大家畀多啲空間佢。」
問楊紫瓊可覺得阿梅工作太頻密？她說：「工作係阿梅嘅生活，唔好成日講佢好瘦，等佢以為自己有事。」
此外，肥媽日前被偷去一輛剛供完款的四驅車，她說：「我只係買咗第三保，保險公司冇得賠，但防盜公司答應賠番萬幾蚊畀我。」
而近日正在趕拍《金雞2》的吳君如，昨晚則以一頭橙色頭髮的金雞look，配搭閃亮的銀色上衣到賀。
採訪：何永寧
攝影：陳志嵐