港股噚日走勢又係先低後高，反映大市仍係好友天下，恒指反覆升46點，收12190。淡友始終質唔穿萬二關，隨時輪到好友大反攻。
大藍籌噚日又係滙豐（005）最威，可能同美資大行高盛調高佢目標價至9.5英鎊有關，滙豐以全日高位117元收市，上升1.50元。滙豐大部份Call輪表現都好搶鏡，其中9157升14%，收0.64元。9157明年6月1日到期，行使價118元，溢價6.3%，槓桿率18.3倍。呢隻輪夠晒爆炸力，加上輪價相對唔算大，重係毫子輪，所以多散戶捧場客。
其實講抵玩，另一隻滙豐Call輪9923數據真係靚，噚日升8.2%，收1.45元。隻輪04年4月19日到期，行使價102元相當價內，所以爆炸力唔算大，但重有5個幾月壽命，居然負溢價0.4%，槓桿率8倍，就確係抵玩，其實9923有效槓桿率有6倍，已經相當夠玩。
一般大行普遍睇滙豐可見9.5英鎊，相當於123.50元左右，正股以現價計唔算太吸引，但正股如有5-6元升幅，玩輪則非常不俗。
另外，長實（001）及和黃（013）股價亦開始有起色，長實Call輪可留意9065，行使價60元，04年3月1日到期，溢價5.5%，槓桿率7.8倍，數據亦算合理，噚日收0.83元，升1.2%。
章盛