新車速報：<br>福士Touareg4.2實力大增

新車速報：
福士Touareg4.2實力大增

眾所周知，福士Touareg跟保時捷Cayenne如出一轍，惟引擎配搭有別；然而，福士車廠早前替Touareg加入一台4.2公升V8偈，令行車表現有大躍進，加上恒式四驅，重有可調校高低及軟硬嘅避震裝置，無論On-road又或者Off-road皆有出眾演繹，對要求高嘅用家嚟講，想擁有一部全天候高性能嘅SUV，價錢又見吸引力的話，咁就真係要仔細考慮一下喇！
記者、攝影：陳偉林

時下SUV潮流所趨，就連歐洲車廠亦注視到，難得德國福士及保時捷車廠攜手合作，分別推出兩款共用底盤嘅SUV新車；福士Touareg要求實用性，而保時捷Cayenne卻着重高性能演繹，惟福士廠方早前替Touareg加入至頂級嘅4.2公升V8偈新型號，對要求高嘅用家嚟講，可會有多一個選擇呢！

■車頭一對Xenon大燈神氣十足，望落倍覺魅力盎然。

■鑲有銀白框邊嘅車門框，份外悅目之餘，一對閃爍門邊電鏡亦見吸引。






外形出眾富剛陽味
講賣相，福士Touareg亦不示弱，一身充滿剛勁美嘅線條，可謂豪情洋溢，加上一對炯炯有神嘅Xenon大燈配搭，以及電鍍鬼面罩同門邊電鏡，閃閃生輝夠吸引之餘，一體式前後泵把連氣霸，還有四輪19吋合金胎軨組合，對要求有一部富朝氣又見魅力盎然嘅SUV用家，委實切合不過。

■車身兩旁備有金屬腳踏連保護桿，有方便上落嘅好處。

■雙出式尾喉鋪排，有助引擎高轉運作，又見呼吸暢順。

■四幅式半皮半桃木軚環，兩旁除備有多功能按鍵外，後方重有+/-轉檔推桿。

■中控台後方分別備有限滑差速、車身高低及避震軟硬選擇。

■四輪內置CDC氣壓避震，可調校合適行車組合。

座艙多變設備講究
至於座艙陳設，兩排高級皮椅以人體工學設計，既貼服又富承托力，而前排重備有全方位電控，當遇有需要時，後排還可以左右獨立收摺放平，令尾廂容量由原來555公升，躍升至1570公升咁多，加上尾門可上下兩截獨立開關，提存物件倍覺方便得多。再者，車廂前後及左右獨立恒溫冷氣連送風裝置，加埋6碟CD連11個揚聲器嘅音響配備，享受愜意又舒適。






出眾底盤操控自如
呢部頂級版Touareg，除擁有一台輸出強橫嘅4.2公升V8偈及6前速Tiptronic連DSP半自動波箱外，響一套電子4XMotion恒式四驅系統輔助下，還備有中央及後輪軸嘅差速裝置，有利攀爬較崎嶇嘅山路之餘，全新CDC電子氣壓避震連軟硬、高低調校，重可以遷就唔同路面環境，令人有操控自如又穩妥嘅觀感；當中最教人喜出望外會係四輪19吋合金胎軨連高抓着力跑車輪胎配搭，想唔到身形魁梧嘅Touareg，公路飛馳同掟彎都咁妥貼㗎！

■車廂陳設好有RVFeel，重見有多一份豪邁感。

■兩排皮椅妥貼舒適，前排重置有全方位電控。





記者試後評語：全天候表現強勁
套用上至強勁嘅4.2公升V8偈，起跑加速感無視車重，演繹強而有力，既有電子恒式四驅，加上雙差速裝置及可調校高低及軟硬嘅電子氣壓避震，行車穩定循迹性高，難得呢部講求全天候性能嘅SUV，重換裝有四輪19吋合金軨連高抓着力嘅輪胎，高速馳騁既可靠又安全，又豈止係一般SUV咁簡單呢！

■大型中控台有齊各項設備，除冷氣及音響外，重頂置有雜物匣。

■後排有獨立送風及恒溫裝置，享受優越。

■一套6前速Tiptronic半自動波箱，可有手波車嘅好玩一面。

■尾廂備有分隔網柵外，後排重可以收摺放平，而地台下重有後備輪胎及氣缸。

■尾門可作兩截式開關，有利提存行李用。

福士Touareg4.2V8規格
引擎：4172ccV8DOHC
馬力：310ps/6200rpm
扭力：41.8kgm/3000rpm
傳動：6前速Tiptronic半自動波，恒式四驅
懸掛：（前）雙搖臂（後）雙搖臂
制動：（前）透氣碟（後）透氣碟（ABS）
輪胎：275/45ZR19PirelliPZeroRosso
尺碼：4754×1928×1762mm
軸距：2855mm；車重：2250kg
0-100公里：8.1秒；極速：218km/h
平均耗油：14.8L/100km
新車售價：$730,000
車輛提供：合泰汽車（28828938）