𠵱家個個男仔都話鍾意儲figure，MichaelLau呢啲年輕設計師好多人都識，但日本有個做膠公仔嘅阿叔山本淳一，已經幫電視台節目做咗十年figure，大家又知唔知呢？
山本最近開咗個個人figure展，原來佢都有唔少fans，因為佢以前主要整政治人物公仔，近年就連明星、卡通人物同體育界強人都唔放過，不過我羅拉就覺得佢整嘅人物只係神似，形就麻麻喇，美國布殊總統、日相小泉純一郎同已故日本人瑞金銀婆婆都一眼就認得出，但塊面就滑咗！
萬人迷碧咸就最失敗，着埋套波衫都唔多掂，但山本話佢做之前會好小心觀察主角嘅形態，但鬼叫碧咸成日換髮型咩？
而最難整嘅人物係邊個？山本話：「梗係Morning娘啦！我做緊時後藤真希同保田圭又話要離隊，整完冇耐又加多四個！」
山本又話：「宇多田光由出道至𠵱家個樣變咗好多，我做得佢好細路女樣，但一下子就做咗人老婆！」重有松浦亞彌，山本話佢啲化妝成日變，個樣都一時一樣，所以佢以後都係少啲整女星figure喎！