最近天朗氣清，風和日麗，股市生意又好，金融界老友啲面口，零舍好睇，比起沙士期間個個死吓死吓嘅黑口黑面樣，簡直係兩個完全唔同嘅世界。
經紀N嘅大老闆雅興大發，叫經紀N組織不同嘅遊艇團，請啲芬佬、分析師、大客戶遊船河，去南丫島吃晚飯或者周末去離島欣賞風景。呢招當然並非新招，乃馮景禧嘅舊橋而已，不過橋唔怕舊，最緊要受，馮先生當年用呢個方法，碼住不知多少大客。經紀N唔敢逆老細意思，唯有照辦，點知打完一輪電話，絕大部份人話冇興趣、冇時間，唔肯落船，經紀N交唔到差，滿頭大汗，問最相熟嘅基金D：「喂，班老友咁唔畀面，係唔係與我老闆過唔去呀？」基金D答話：「有人唔妥你老闆，大家都係唔妥維多利亞港嘅波浪啫，去南丫島食晚飯，五點幾落船，由皇后碼頭去到青洲海面，隻遊艇已經 到我哋嘔泡，食完飯返嚟，可能連食嘅餸都嘔埋，食餐飯，使乜咁辛苦呀。唔係怪你老闆，只係怪政府填海填到維港波濤洶湧啫！」
經紀N諗咗一輪，提議隻艇由深灣來回南丫島，大家坐車去深灣上船，以避過維港風浪，但好多人又話唔方便，驚塞車，阻時間，卒之遊河之議拉倒，經紀N位老闆大感冇癮。經紀N嘆曰：「今時唔同往日，搞遊艇河咁煩，我都要去支持徐嘉慎。」