麗豐控股喺內地主要做地產，但始終離唔開搞番一啲同娛樂事業有關嘅業務，好似上海凱欣豪園同五月花生活廣場，都會有電影院。其中凱欣豪園嗰個，搵咗名導演及監製吳思遠幫手做設計㖭。
聽吳大導講，因為佢之前喺北京同上海各搞咗1間戲院，分別喺北京UME華星，同埋上海UME新天地，都做得唔錯，票房每年各有2500萬同1500萬元，加上佢熟悉內地搞影院嘅諸多要求同限制，所以麗豐先至搵佢。
佢計劃將凱欣電影院設計成兩大、兩小嘅迷你影院，走高檔路線，其中只坐數十人嘅細影院，設計意念重會好似太古城嘅Director'sClub咁。佢重話CEPA之後，都諗住開番幾部戲，但就唔會做導演，因為做導演好辛苦喎。
話咁快有線電線成立10周年，噚日喺金鐘萬豪酒店舉行慶祝酒會，九倉宴請眾賓客到場慶祝，場面盛大唔在講，一眾董事們自然要講吓啲恭賀說話，順便錄低畀自己嘅有線台播放。
負責賣樓嘅助理董事黃光耀，係出鏡一分子。佢除咗識得借有線10周年搞樓盤優惠宣傳外，出鏡錄影亦相當識做，基本上都估到佢嘅台詞係：「恭祝有線業務蒸蒸日上」。
噚日係萬聖節，中原為元朗綠庭園開記者會亦應吓節，準備咗古靈精怪嘅道具。一向貪玩嘅恒基張炳強，見到南瓜公仔愛不釋手，重爭住認做細佬，好開心咁介紹畀大家識，呢個一年先至出嚟一次嘅「張炳南」或者「張瓜強」，就咁做咗記者會嘅特別嘉賓。張炳強重扮埋佢「細佬」答傳媒問題，相當鬼馬。
除咗南瓜，重有蜘蛛、面具同手套做道具，一向形象高貴嘅新世界何伍燕榆，就揀咗個紫色羽毛面具，雍容華貴之餘亦夠晒應節。而何太噚日重一日走兩場，出席咗兩個記者會，唔知會唔會有第3場，夜晚整番個新look慶祝萬聖節呢？
香港好多有錢人，做起善事上嚟都不甘後人，好似長實李嘉誠同新地郭氏兄弟，每年都捐唔少錢。已經90高齡、兼且出名慳家嘅麗新集團主席林百欣，原來過去已經捐咗超過6億返大陸做慈善工作。
今次趁上海凱欣豪園個記者會，順道搞埋再捐1000萬元人民幣畀上海慈善基金會嘅儀式。善款嘅一半，會用嚟為上海1萬名貧困老人買慈善醫療卡；另一半就用嚟醫貧困老人嘅白內障，同幫細路仔做先天性心臟病手術。
每間機構都有本身嘅管理哲學，點至係最好就冇定論。
亞洲電視今晚首播嘅「企業家毅行者系列」，第一輯訪問中原集團主席施永青，上集係「我在中原逐鹿」，內容就係講施生管理中原嘅哲學，聽講電視台重訪問埋中記一眾董事對佢嘅睇法，然後畀番施生睇。
至於下集係「中原神州縱貌」，講吓中原中國喺內地嘅發展。
蘭西
電郵地址：
