王見秋炒人事件鬧得滿城風雨，唔少人質疑秋官出任公職嘅能力。八方噚日見到有公職王之稱嘅李業廣，自然要請教吓。李業廣雖已年屆六十七，六年前辭去佢有份創辦嘅胡關李羅合夥人職務後，就不斷接公職，包括港交所主席、積金局主席、藝術節協會主席，佢精力充沛，公職超過十個。
李主席話，佢做公職嘅原則，係盡量少沾上金錢利益，所以佢唔收政府人工，連秘書到司機，佢都係自己出，費事用咗公帑請人後會俾人有話柄，直情係貼錢打工，都算唔話得。唔講唔知，原來佢做過平等機會委員會委員，但對於秋官事件，李主席話唔係好認識秋官，唔方便多講，睇來呢樣都係公職生存之道。
（圖）好少出席酒會嘅南豐集團主席陳廷驊（左），同長實主席李嘉誠寒暄一番。
傳真︰2623-9278
電郵︰