上海律師鄭恩寵為靜安區居民請命，告政府及上海首富周正毅呃啲平民百姓，非法攞咗人哋嘅土地，點知「出師未捷身先死」，鄭自己反而被控洩密罪，判刑三年。呢單嘢噚日重有下文，就係有個香港女子沈婷上京為鄭請命，竟被公安搶劫，求助無門。當然呢件事重有待考證，但係已經好得人驚，問你班香港大律師同小律師重敢唔敢對「屍爬」抱有太大幻想？
八方唔係潑冷水，原來最近律師會請咗啲國內同行來港，閉門講吓「屍爬」嘅商機，點知大陸嘅同胞都好坦白，叫香港律師要有某程度嘅心理準備，而如果各位喺內地少啲關係，少啲背景，都係唔好敲門。言下之意，只有大律師行或者會有得玩。
至於個啲抱住香港優勢「法治精神」去搵生意做嘅，就死得快啲。因為大家都心照啦，祖國大地唔同你講呢味嘢，入得法院告人，對手九成九都係幹部，或者同幹部有聯繫，邊有得打啫，除非你後台威過佢啦！
所以最後嘅結論係，揹住政協常委嘅劉漢銓哋就會夠膽去，其他民主派人士上去，咪送羊入虎口，吓吓自己執生，出咗事唔使旨意老董會救你，詩姐姐呢鋪都睇怕枉費心機。
傳真︰2623-9278
電郵︰