大市噚日雖然只係升咗46點，但唔少股份炒到飛起，實在令小初異常興奮，尤其係新股寶姿（589）同埋中航科工（2357）表現勁抽，相信會吸引更多國內企業來香港上市，掀起一陣炒新股熱潮。
噚日光大系一門三傑表現唔差，光大控股（165）升2.4%，收4.275元，成交金額6822萬元，至於光大國際（257）就升1.54%，收0.33元，而光大科技（256）走勢最勁，大升6.4%，收報0.335元。
經紀陳話，光大系3隻股份中，短期內最值得留意係光大科技。光科賣殼傳聞已傳咗成年，但只聞樓梯響，不見人下來，真係令人等到悶，但據講有幕後人士堅稱就快事成，好快會出現控股權變動。
據講光科年初斥資買入北京朝陽區一幅土地時，已經為賣盤作部署，然後在7月份，又突然更換核數師，由羅兵咸轉做安永，但光控同埋光國仍然用番羅兵咸，令光科賣殼一事，迹象更為明顯。
因此，光科今次雖然係舊聞新傳，但唔好掉以輕心，可能真係有料到。
慕容小初