自從WebCam發展到可以拎出街影相之後，新產品一浪接一浪咁推出，亦憑住幾百蚊抵玩價，令好多用家都作為購買真正DC嘅前奏，起碼用過一段時間，會更明白日後購買DC嘅方向。
記者：徐影龍
富達電腦近排返咗隻Cool-iCamG3數碼相機，雖然仍以WebCam為設計骨幹，不過就順應潮流，加入更多功能，外形亦比一般流動型WebCam較靚仔，細細部兼輕巧，袋出街周圍影相都好方便。規格方面，Cool-iCamG3具有130萬像素輸出，相片最高解像度為1,280×1,024，已足夠製作網頁或列印3R相片。
Cool-iCamG3較出色地方，係機身內置兩倍數碼變焦功能，雖然會令相片較為粗糙，不過對一般用家嚟講，即場拍攝取景或度構圖時，都可較為靈活。機身內置8MB記憶體，以低解像度拍攝，可儲存過百張相片，若嫌未夠，亦可外加CF記憶卡。其他功能如自動曝光、自動白平衡、自拍及閃燈等功能，均一應俱全，以六百蚊有找嘅價錢計，可以影相、拍片同駁電腦做WebCam，算係唔錯嘅選擇。
富達電腦
查詢電話：28544878
