旅行遠足，未必一定要坐兩個鐘頭車、一個鐘頭船先至叫去郊外。喺密麻麻嘅石屎森林之中，亦可以發掘行山樂趣。唔信？介乎慈雲山慈愛苑與沙田博康邨之間，就有一條環境不錯嘅山澗郊遊徑，只花短短兩個小時就能獲取不俗嘅遠足快感，早就係附近屋邨居民嘅郊遊熱點。
記者：鍾可強 攝影：陳盛臣
Model︰Fanny、Carmen（RichStrategy）
涼涼秋風吹來，喚醒香港市民迎接行山季節，連十歲小朋友都猛說行山可以強身健體。不過，勞師動眾帶齊一大袋登山工具，十足十遠征世界最高山峯咁款，又似乎太誇張，行山啫唔係去打仗，輕輕盈盈小背囊加兩支水、一本地圖，根本已經能夠獲取當中樂趣，正是「細有細玩，短有短行。」
Carmen今次專登安排咗一個輕便行山路徑供Fanny初試啼聲，一睇Carmen長袖T恤，戴上帽子，蒸餾水，就知佢都有唔少行山經驗。「梗係，山徑樹多水澗密，長袖T恤同埋鬆身行山多功能長褲就係最佳拍檔。」一副行山專家口吻，算啦，喺初哥Fanny面前，由得你攞彩啦。
梯級陡斜易索氣
「今次嘅目的地係馬鞍山郊野公園，由慈雲山出發，全程三公里多，行得快嘅話，兩個鐘頭可以行畢全程，屬於無難度遠足。」Carmen相約Fanny喺慈雲山慈雲閣集合，然後喺隔鄰嘅巴士總站一條上山小路出發，其間不斷強調行程屬A級難度，好易行。半信半疑嘅Fanny緩緩跟喺後面，滿以為易行得不費吹灰之力，誰知向「慈雲勝地」嘅進發，陡斜嘅山路，已教她吃不消。
儘管沿途有竹樹遮蔭，古道亦經重新修葺，屬新建嘅水泥梯級，但要一個從未行過山嘅女孩一口氣行上十多分鐘，都係一個考驗。幾經辛苦，Fanny終於捱到「慈雲勝地」，但已經氣喘得全無心情去欣賞觀音廟風光。「又話好易行，我腳仔軟嘞。」Fanny坐喺石級作出投訴，當佢知道還有二十分鐘路程，才到平地，小妮子嚷着回程。
「都上咗一半，捱埋佢啦，行埋呢程就再無山路㗎嘞。上到獅子亭就好舒服㗎！」Carmen積極鼓勵呢位打算半途而廢嘅行山初哥。攤唞咗近二十分鐘，Fanny方才肯再上路程。大家都當然估得到，呢段本來只有十多二十分鐘嘅路程，Fanny必定係唞一半行一半先至捱到半島獅子園，當佢望見獅子亭嘅同時，亦望到沙田坳道路牌，一架私家車在兩人身邊駛過。
喝杯豆漿加加油
「吓！早啲講吖，原來有車上嚟㗎，搭的士咪掂晒咯！」Fanny向行山師傅Carmen埋怨。整個行山路程忍住唔爆嘅Carmen，突然大叫一句︰「你以後唔好再叫我帶你行山嘞。」氣氛立時變得尷尬，正在僵持之際，幸好有位茶寮老闆二伯出現，「小妹妹，唔好咁勞嘈，埋嚟飲啖自家製薑汁撞豆漿，又或者食碗薑糖腐花，順一順條氣先。」又估唔到，路邊呢間叫恆益嘅小士多，出品又幾正喎。「我老頭子三十幾年前已經喺度擺檔㗎嘞，佢交畀我做都十幾年。我哋嘅算自製豆漿，勁解渴，行山至啱。」
坐喺恆益茶寮嘅露天座位，遙望九龍中及港島東一帶嘅景色，喺山風吹拂下，真係舒服到唔捨得走。
「嗱，你哋向前面山路落返去，就係沙田博康邨，沿途好多山澗，景色唔錯㗎，而且好易行，我多數推介啲遊人行呢條路。如果你想行勁啲，可以走麥理浩徑過紅梅谷，但難度高好多。」二伯仔細向兩位女孩分析前路。
「梗係落山啦！」Fanny第一時間搶白。Carmen本來都係帶Fanny行呢條路，當然唔會臨時改路啦，唔驚Fanny又再發爛渣咩。
溪澗流水相伴行
告別二伯，兩人在指示牌旁嘅下山小徑落山，呢條路平緩易行，兩旁樹林嘅花草青翠，途經一個位於石澗旁嘅燒烤場，面積唔細，又有山水流經，絕對係理想燒烤地方。
「下次我哋約齊啲Friend嚟呢度燒嘢食都好喎。不過就唔好由頭先嗰條路上嚟，不如調轉由我哋落山呢邊上嚟吖，近啲啩，啊？」Fanny心情開始靚番，正計劃另一次郊野燒烤行。「你諗都唔好諗呀，我哋𠵱家行落去沙田博康嘅馬鞍山郊野公園，都要半粒鐘有多，調轉行返上嚟呢個燒烤場，行慣山嘅都要兩個鐘以上。你呀，加埋攤唞，五個鐘啦！」Carmen一臉不屑嘅面色諷刺呢個不屑徒兒。
果然，兩人沿着石澗落山，路程頗遠，更何況要行上山。但係你唔好理，一樣有唔少登山者同兩位姑娘逆線而行。「你睇吓人哋啦，呢啲先叫行山吖嘛。你睇吓石澗都話難行，點做我行山徒弟呀。」Carmen盡情揶揄，氣得Fanny全無心情去欣賞遠方沙田紅梅谷景色。加上雖然落山並不太困難，但行了一大段路。呢個初哥開始露疲態。不過前面「馬鞍山郊野公園」嘅牌坊，令Fanny如釋重負，到終點啦！
交通︰
從黃大仙地鐵站乘37M小巴到慈雲山北總站下車，巴士總站背後有山路上山。
