王從希、梁琤、鍾麗淇、黃安琪同埋鄭嘉穎，噚日喺香港外展訓練學校宣傳新節目《Columbia精英野外狂奔》，佢哋重分成兩組比賽拔河同繩網陣。
王從希係今屆落選港姐之中嘅風頭躉，噚日雖然着到密密實實，但單憑佢嘅青春同奇峯突出嘅身材，仍然輕易成為焦點，尤其係佢玩繩網陣時就更加不得了，導師要佢用雙手拉繩兼單腳踩喺條繩度，好似泰山咁將個人fing去對面，但見佢喺原地轉咗好耐都過唔到對面，結果fing嚟fing去半天吊，最後要勞動兩個導師同埋一個隊友，三個男人先接得住佢，連做慣打女嘅隊友梁琤都話，最有難度嘅係同王從希同組。
不過儍人真係有儍福咯，淨係得王從希一個得到贊助商贊助佢一年服裝任攞，王從希就好醒目咁揀咗件最新款兼最貴、價值三千幾蚊嘅風褸話送畀阿爸王偉，個女咁醒目，相信王偉都笑得出啦！
李逸朗（阿Don）噚日去到時代廣場出席一個遊戲機宣傳活動，原來阿Don目前有一個暗戀對象，當記者追問佢係邊個時，阿Don就好怕醜咁喺度儍笑，之後就不停大讚佢心目中嘅女神又靚、又善良。記者問佢係唔係2R嘅Race，佢就笑住咁不停擰頭，阿Don話總之今次會用真誠去打動對方，所以每日都會打電話溝通，因為佢希望有個長線嘅發展喎。
劉若英日前到新疆拍新碟《我的失敗與偉大》封面照，佢此行翻山越嶺去新疆極北部嘅喀那斯湖拍攝，劉若英表示今次行程失敗之處係當地人實牙實齒話個湖有水怪出沒，但係拍足五日都冇見過，令一心一意想睇水怪嘅佢一直未能如願。而最開心嘅事，就係佢喺喀那斯湖邊遇到識講國語嘅維吾爾老人，重開心到攬住個伯伯影相，佢話係因為終於遇到識講國語嘅人喎。
蓋鳴暉噚日出席一個慈善活動，佢話師傅林家聲嘅心情已經平復番好多，不過師母始終都係十月懷胎生個仔出嚟，所以就比較痛心。佢亦都透露，師傅可能會喺月中，帶埋亡兒嘅骨灰返去加拿大。蓋鳴暉重話希望時下嘅年輕人要尊重生命，唔好因為小小事就輕生。
李泉噚日去新城做訪問，佢話當日中國第一個太空人楊利偉飛上太空時，佢咁啱喺北京嘅天空上，因為航空軌道要調節，搞到佢班機延遲咗成個鐘至可以降落，所以佢笑話自己對楊利偉今次升空都付出咗貢獻，不過佢就話唔會作首歌歌頌對方，因為佢唔鍾意咁表面嘅事，咁咪踩埋一班為楊利偉訪港高歌嘅歌手！
