區議會選舉進入白熱化階段，但特區政府又唔生性，搞到日日都有新議題，一陣填海、一陣滾石，加埋秋官，益咗班政黨。
八方記得林D8早前講過，若果就新選舉條例容許班問責司局長助選嘅詳情一有一致立場，就會話畀八方聽，但係等到𠵱家，都冇消息，原來冇人有特別意見，所以當局冇嘢好講喎。
其實講真，你話三司十一局加埋董特首，可以數得出有幾多個有分加？請佢哋嚟站台，肯定壞事多過好事。
講開老董，佢今日認真忙，下晝兩點去完羅康瑞工商專聯喺演藝學院個CEPA研討會，又要跑番政府總部見獨立議員，之後趕去金鐘畀面吳光正，賀有線成立十周年，逗留一陣，就跑上上亞厘畢道禮賓府恭候中國第一位太空人楊利偉抵埗。
雖然楊利偉來港挺佢，老董都唔得閒招呼，星期六佢會去海南島出席博鰲論壇，見吓溫總理，星期日先返香港。
傳真︰2623-9278
電郵︰