英格蘭「壞孩子」加斯居尼（Gascoigne），三十六歲人重算踢得下，但始終已過高峯，對好多頂級聯賽球會嚟講，真係送都唔要！不過超聯升班馬狼隊最近就畀機會佢跟操，周中重參與球隊預備組賽事，重有五百多觀眾睇㖭，唔通真係可以再遇上職業生涯嘅第N個春天？
其實佢近年都有唔少機會繼續職業足球生涯，不過次次去到新球會，總係三分鐘熱度，過得一陣又失控，搞到自己神憎鬼厭。希望呢次佢真係把握機會至好，我求大俠都想重溫一下，當年由佢同𠵱家亦踢緊狼隊嘅恩斯等人組成九十年代嘅英格蘭黃金中場線，可唔可以「瘋」華再現！
你話利物浦個希斯基係唔係一個好前鋒呢？睇佢前晚聯賽盃對布力般，兩番施頭槌破網，表現堪稱教材；但下半場佢得到隊友讓佢主射十二碼，諗住造就佢大演帽子戲法啦，點知就宴客，嘥晒隊友心機！一個好嘅前鋒，係應該頭又得腳都得嘅。希斯基…重係差少少！
真係要讚下部份外圍莊家好嘢，識得揀波嚟開盤！好似周中各地進行盃賽，其中意大利盃就出現正常戰果，強隊佔主場之利，大都贏波冇甩拖。但係莊家們就並無為呢個賽事開盤，偏偏揀咗出現多場和局及意外戰果嘅德國盃及英格蘭聯賽盃受注，將贏輸風險交晒畀波友！
三色台今季對香港賭波合法化呢樣嘢真係後知後覺，闊佬懶理之下，終於畀人搶晒各大足球賽事播映權，嗰度都唔知流失幾多廣告收入啦！最近佢哋終於攞到個荷甲聯播映權，不過荷甲聯並非足智彩主打項目，開波時間更撞正意甲聯及西甲聯等更四大聯賽賽事，睇嚟都係嘥氣之作！
「白頭佬」拉雲拿利雖然年尾就滿三十五歲，但就重係寶刀未老。喺前晚進行嘅蘇格蘭聯賽盃第三圈賽事，佢只係用咗八分鐘就完成帽子戲法，協助鄧地贏蘇甲聯隊克萊德五比二晉級。鄧地十二月會喺蘇超聯對格拉斯哥流浪同埋些路迪，睇嚟呢兩支球隊屆時肯定派專人招呼佢。