古巨基日前以預防愛滋病宣傳大使身份，到北京拍攝宣傳主題曲MV。基仔離開取景的海灘後得知地上滿布金屬粒，即笑罵髮型師知情不報，害他錯過發達機會。
古巨基連續第三年獲中央衞生部委任為預防愛滋病宣傳大使，他早前到北京兩天拍攝新一輯國語主題曲《飄動的紅絲帶》的MV及宣傳片，稍後在北京中央台及全國播放。
拍攝當日，基仔在北京近郊的秦皇島海灘取景，該處沙灘滿布金粒，但基仔卻大歎沒有橫財命，未能因此發達。基仔笑說：「我開頭都唔知個沙灘有金執，係拍完後返酒店途中髮型師講㗎，佢話喺海灘無聊玩嘅時候，撩撩吓見到啲沙好閃，好似係金嚟。同當地居民講起，先知嗰個沙灘真係有好多金屬粒，我咪鬧佢執金唔預我囉。」
基仔謂髮型師解釋因見他正忙於拍攝，為免阻礙進度沒有立即告知，基仔說：「其實我都唔係想執金發達，係黃金都一早俾人執清啦，邊有不勞而獲呀。我只係覺得未見過難得玩吓啫，髮型師自己都冇帶走啲金屬粒，我鬧佢都係講笑啫。」
基仔表示秦皇島風景怡人，將之前在攝影廠吊威吔的辛苦忘得一乾二淨，他說：「個MV係以愛滋病為主題，導演用比喻的手法呼籲大家畀多啲關懷同愛畀愛滋病人。有條金魚喺個獨立魚缸，另外又有一群金魚喺個大魚缸度，跟住我作狀游入魚群中，寓意愛滋病人過番群體生活。」
結果基仔要吊威吔做出游水動作，幸好他有不少拍古裝吊威吔的經驗，故早已駕輕就熟，基仔說：「吊威吔辛苦我都頂得住，唯一難嘅係我唔識游水，都唔知點做游水動作，惟有想像自己打緊麻將。」
