香港興業嘅東涌藍天海岸，不時都搞新意思，今次就舉辦新思維義賣行動，為兒童癌病基金籌款。義賣內容係樓盤三個示範單位裏面嘅家具同擺設。
今個禮拜六，大家去到示範單位，就會見到啲物品貼有價錢牌，啱心水嘅就可以買咗佢。
過去，樓盤示範單位「任務」完成之後，會將物品統統入倉，好多時擺擺吓連發展商都唔記得。香港興業今次搞義賣，可以話係一舉兩得，重好值得鼓勵㖭。其他發展商不妨都效法吓。
香港興業今日會開記者會，宣布呢個咁有意義嘅活動，兒童癌病基金會副會長莫何敏儀及張之珏，重有藝人陳文媛都會出席。
另外，香港興業今日會趁萬聖節，喺愉景灣愉景廣場搞「HalloweenBash鬼聲鬼氣鬼咁癲」慶祝活動，任何人都可以免費參加。愉景灣有唔少外籍人士聚居，相信呢類活動夠晒氣氛。
本港樓市對外資吸引力有幾大，聽吓美聯主席黃建業嘅古仔就知嘞。有位嚟香港旅遊嘅美國人，喺美聯網頁上睇到本港樓市資料，噚日中午重到美記總部查詢，咁啱大部份同事都出外食飯，黃建業見狀，親自出馬同佢講咗成十分鐘。
呢名美國投資者，手揸二百萬美金，約一千五百六十萬港元，比較過美國、新加坡、上海同香港嘅樓市，覺得本港樓價具吸引力，所以趁旅遊期間順道考察。聽講佢諗住喺香港吸納啲商舖同寫字樓做投資。
利嘉閣地產見樓市交投量漸漸回升，拉上大型橫額，標題「樓市復甦，入行黃金時機，與其浮浮沉沉，不如做地產代理搵真銀。」，話畀大眾聽，𠵱家係加入地產代理賺錢嘅好時機。噚日同今日，喺機鐵青衣站舉行全港首個地鐵站大型招聘會，各行各業人才，剛畢業嘅大學生，都係吸納對象。
公司負責人廖偉強話，目標係請一百名前線主管同營業員，公司分行數目，料兩年內增加至一百五十間。
蘭茜昨日寫過富豪海灣樓書，富豪酒店董事范統話，兩個月前已經印咗一批富豪海灣售樓書畀啲客，除咗D1董事屋外，其餘每種類型嘅洋房都有印幾千本書仔，所以一套總共有八本咁多。淨係印樓書都要過百萬。佢透露，公司重搵專人送書畀啲上市公司老闆，認真識做。
不過，蘭西多次出席富豪海灣記者會，都收唔到份咁靚嘅售樓書，搞到以為佢哋一直都係用緊份簡單嘅臨時售樓書，發展商於是第一時間派人速遞咗套畀蘭西，都算有效率。
范統又透露，啱啱送咗約六十套去中原地產，畀內地分行啲客睇。咁富豪酒店明年去內地做路演時，就可以事半功倍啦。
睇到圖中呢個盒，大家係咪諗起快餐店嘅外賣漢堡包呢？裏面漢堡包就冇嘞，有嘅係新地觀塘創紀之城第五期商場嘅開幕請柬。
呢個商場可說是全觀塘最大，發展商為令人有深刻印象，花盡心思，設計出夠晒有創意嘅請柬。
有關開幕儀式，發展商方面就大玩神秘，點都唔肯透露有乜內容，只係叫記者到時去到就知嘞。單係請柬都咁花心思，開幕又點會嘢小呢！
據新地年報顯示，喺觀塘道四百一十八號嘅創紀之城第五期商業發展，總樓面約有一百三十萬方呎，包括一個六十萬方呎區域商場。項目預期明年至落成，所以今次嘅開幕慶祝活動，就要移師到隔籬街嘅創紀之城一期舉行。
蘭西
電郵地址：
