現貨月期指噚日結算，港股走勢相當反覆，初段曾跌穿萬二關，最低11989，但好友力托滙豐（005），保住期指在萬二點上結算，午市藍籌股普遍反彈，其中以電訊股表現較佳，電盈（008）由最多跌0.20元，最後平收5.60元。中移動（941）則由最多跌0.60元，到最後僅跌0.10元，收22.45元。睇勢電訊股今日有機會持續回升，中移動Call輪不妨優先留意。
今日如果見中移動企穩20日線22.45元，可伺機買啲中移動Call輪博反彈。中移動Call輪中，以9656較熱鬧，噚日收0.123元，跌4.6%。9656今年12月18日到期，行使價22.88元，溢價7.4%，槓桿率18.3倍。
如果正股升得急，9656較具爆炸力，特別升穿22.88元，由價外變價內之時，但缺點係壽命短、溢價高，唔好話睇錯市，只要正股牛牛皮皮，淨係輸溢價亦相當傷。
相比之下，9861則可以玩得較安心，噚日收0.455元，跌2%，隻輪壽命同9656差唔多，03年12月17日到期，行使價18元，屬於相當價內，但溢價只有0.5%，槓桿率4.9倍，其實數據相當不俗，正股走勢牛皮亦可以一守，唔怕輸溢價。
以上兩隻中移動Call輪各有優點，不妨視乎正股走勢作靈活選擇。
章 盛